Беш аз 70%-и квотаи кор ба хориҷиҳо дар Тоҷикистон ба соҳаҳои сохтмон ва саноат рост меояд

Эмомалӣ Раҳмон, раисҷумҳури Тоҷикистон бо имзои як фармон квотаи муҳоҷирати хориҷӣ ва ҷалби қувваи кории хориҷӣ ба Тоҷикистон дар соли 2023 муқаррар карда шавад. Қисми асосии ин квота (беш аз 70%) барои кормандони соҳаи сохтмон ва истеҳсоли саноатӣ дода шудааст, дар ҳоле, ки беш аз якуним миллион тоҷик дар Русия дар ин ду соҳа ба кор машғуланд.

Дар санаде, ки дар портали иттилооти ҳуқуқии Вазорати адлия нашр шудааст, гуфта мешавад, ин фармон бо мақсади ташкил ва танзими ҷараёни муҳоҷирати меҳнатии шаҳрвандони хориҷӣ ба Тоҷикистон содир шудааст.

Дар фармон дастур дода мешавад, ки квотаи муҳоҷирати хориҷӣ ва ҷалби қувваи кории хориҷӣ ба ҷумҳурӣ барои соли равон бо шумораи 7 ҳазору 500 нафар муқаррар карда шавад.

“Шаҳрвандони хориҷӣ, ки фаъолияти меҳнатиро дар лоиҳаҳои афзалиятнок ва созишномаҳои сармоягузории соҳаҳо дар асоси санадҳои байнидавлатӣ ё байниҳукуматӣ амалӣ менамоянд, ба квотаи мазкур дохил намешаванд”, — зикр мешавад дар санад.

Мувофиқи санади мазкур 4950 квота (66% аз шумори умумӣ) барои шаҳрвандони Чин, 550 — Афғонистон, 300 — Эрон, 250 — Ӯзбекистон, 230 — Русия, 200 — Туркия, 130-квотагӣ — Қирғизистон ва Покистон, 120 — Ҳиндустон, 100 — Қазоқистон ва 540 квота — барои дигар кишвраҳо пешбинӣ шудааст.

Қисми зиёди хориҷиён (3453 квота) барои кор дар Душанбе, 1572 нафар — дар Ноҳияҳои тобеи марказ, 1235 — вилояти Хатлон, 1090 — вилояти Суғд ва 150 нафар — ВМКБ ҳуқуқ пайдо мекунанд.

Квотаҳои кор барои хориҷиён дар соҳа ва бахшҳои зерини иқтисоди Тоҷикистон пешбинӣ шудаанд:

— 3038 – сохтмон;

— 2145 – саноати истеҳсолӣ;

— 565 – тиҷорат;

— 230 – кишоварзӣ;

— 195 – маориф;

— 185 – геология;

— 160 – хӯроки умумӣ;

— 125 – нақлиёт;

— 95 – ХМК ва хизматрасонии маишӣ;

— 85 – энергетика;

— 75 – тандурустӣ;

— 74 – алоқа;

— 45 – варзиш;

— 483 – дигар соҳаҳо.

Гуфтанист, ки соли гузашта низ ҳукумат барои ҷалби қувваи кори хориҷӣ ҳамин миқдор квота муқаррар карда буд.

Дар соли 2022 ҳам зиёда аз 60%-и квотаҳо барои шаҳрвандони Чин пешбинӣ гардида буд. Ба кишварҳои вазни қиёсиашон нисбатан бештар дар ин самт ҳамчунин Эрону Туркия, Ӯзбекистону Русия ва Қазоқистон дохил мешуданд.