Фирӯз Бобоев (маъруф ба Зайд Бобоев), узви Ҳаракати сиёсии “Гурӯҳи 24”, бори дувум аст, ки аз ҷониби мақомоти ҳифзи ҳуқуқи Туркия боздошт шудааст. Ин боздошт рӯзи 23-юми январи соли 2025 сурат гирифта, ҳоло ӯ дар маркази истирдоди ин кишвар нигаҳдорӣ мешавад.
Ба иттилои “Гурӯҳи 24”, вакили дифоъаш барои пешгирӣ аз истирдоди ӯ ба Тоҷикистон талош дорад. Дар ҳоле ки Бобоев дорои иқомати муваққатӣ дар Туркия мебошад ва аз соли 2016 ҳамчун паноҳандаи сиёсӣ дар ин кишвар зиндагӣ мекунад, боздошти дубораи ӯ боиси нигарониҳои ҷиддӣ шудааст. Номи ӯ аз соли 2018 дар дафтари Комиссарияти Олии Созмони Милали Муттаҳид дар умури паноҳандагон ҳамчун паноҳандаи сиёсӣ сабт шудааст.
Нигарониҳо аз эҳтимоли истирдод
Мухолифон ва созмонҳои ҳомии ҳуқуқи инсон эҳтимоли истирдоди Бобоевро ба Тоҷикистон таҳдиди ҷиддӣ ба амнияти ӯ арзёбӣ мекунанд. Ҳаракати сиёсии “Гурӯҳи 24” аз созмонҳои байналмилалии ҳуқуқи башар ва кишварҳои демократӣ даъват кардааст, ки барои пешгирии истирдоди ӯ ва озодияш талош намоянд. Ба гуфтаи ин гурӯҳ, Туркия барои мухолифон ва фаъолони сиёсӣ ҷои амн нест ва хавфи истирдоди онҳо ба Тоҷикистон вуҷуд дорад, ки дар онҷо шиканҷа ва маҳкумиятҳои тӯлонӣ онҳоро таҳдид мекунад.
Боздоштҳои қаблӣ ва истирдоди фаъолон
Бори аввал Фирӯз Бобоев моҳи августи соли 2024 бо дархости мақомоти Тоҷикистон дар Туркия боздошт шуда, беш аз ду моҳ дар маркази истирдодии шаҳри Чанқалла нигоҳ дошта шуд. Бо вуҷуди он ки ӯ озод гардид, мақомоти Туркия бори дигар ӯро боздошт намудаанд.
Дар гузашта, ҳодисаҳои истирдоди фаъолони “Гурӯҳи 24” ба Тоҷикистон нигарониҳоро бештар кардааст. Суҳроби Зафар, раҳбари “Гурӯҳи 24”, 10-уми марти соли 2024 ва Насим Шарипов, узви фаъоли ин гурӯҳ, 23-юми феврали соли 2024 дар Туркия беному нишон шуданд. Баъдан, Додситонии кулли Тоҷикистон тасдиқ кард, ки онҳо ба Тоҷикистон истирдод шудаанд. Моҳи октябри соли 2024, Додгоҳи олии Тоҷикистон Суҳроби Зафарро ба 30 сол ва Насим Шариповро ба 20 соли зиндон маҳкум кард.
Ҳодисаи мазкур нишон медиҳад, ки боздошт ва истирдоди мухолифони сиёсӣ аз Туркия ба Тоҷикистон ба як раванди нигаронкунанда табдил ёфтааст. Созмонҳои байналмилалии ҳомии ҳуқуқ даъват кардаанд, ки истирдоди фаъолони сиёсӣ, ки дар кишварҳои дигар паноҳ бурдаанд, бояд қатъ шавад.
Ояндаи норӯшани Фирӯз Бобоев
Ҳоло интизор меравад, ки додгоҳ дар Туркия қарори ниҳоӣ дар бораи истирдоди Фирӯз Бобоевро қабул кунад. Агар шикояти вакили дифоъаш рад шавад, эҳтимол меравад, ки ӯ ба Тоҷикистон фиристода шавад. Ин ҳолат метавонад ба сарнавишти дигар фаъолони сиёсӣ таъсири ҷиддӣ расонад ва бори дигар масъалаи таъмини амнияти мухолифони сиёсиро дар сатҳи байналмилалӣ пеш орад.
Мо ин қазияро пайгирӣ мекунем ва дар сурати дастрас шудани маълумоти иловагӣ, шуморо хабар хоҳем дод.
