Ҳамагӣ ду ҳафта пас аз оғози давраи раёсати ҷумҳуриаш, Доналд Трамп бо изҳороти баҳсбарангез сиёсати чандиндаҳсолаи ИМА-ро шикаст ва эълом дошт, ки қасд дорад Ғаззаро ба “Биҳишти Ховари Миёна” табдил диҳад.
Ин изҳорот дар ҳолест, ки пас аз тақрибан 16 моҳи бомбаборони Исроил, ин минтақа ба харобазор табдил ёфтааст. Тибқи омори мақомоти Фаластин, дар натиҷаи ин ҳамлаҳо беш аз 47 000 нафар кушта шудаанд.
Изҳороти Трамп вокунишҳои шадиди қудратҳои ҷаҳониро ба бор овард. Русия, Чин ва Олмон изҳор доштанд, ки ин иқдом танҳо ба “ранҷ ва бадбинии бештар” дар минтақа мусоидат хоҳад кард.
Радди пешниҳоди Трамп аз ҷониби кишварҳои минтақа
Арабистони Саудӣ, ки яке аз қудратҳои калидии минтақавӣ маҳсуб мешавад, пешниҳоди Трампро комилан рад кард.
Ҷеймс Гелвин, устоди Донишгоҳи Калифорния, Лос-Анҷелес, гуфт:
“Аввалин вокуниши ман ин буд, ки Трамп – ҳамон Трамп аст. Ин пешниҳод ҳеҷ шонси амалӣ шудан надорад. Он маънои поксозии қавмӣ дар Фаластин ва Ғаззаро дорад. Ин ҳамчунин ишора ба сафарбаркунии нерӯҳои низомии Амрико мекунад. Он қонунҳои байналмилалиро поймол мекунад ва фаластиниёнро маҷбур месозад, ки аз ҳуқуқи худ ба замине, ки дар он зиндагӣ мекунанд, даст кашанд. Ин усул кор нахоҳад кард.”
Трамп ҳангоми маъракаи пешазинтихоботии худ дар соли 2024 ва пас аз бозгашт ба қудрат, борҳо таъкид мекард, ки мехоҳад ба ҷангҳои “бемаънӣ” хотима диҳад ва аз оғози низоъҳои нав ҷилавгирӣ кунад.
Вокуниши ИМА ба интиқодҳои ҷаҳонӣ
Дар ҷараёни сафараш ба Гватемала, котиби давлатии ИМА, Марко Рубио, дар як талоши ошкор барои рафъи интиқодҳои байналмилалӣ, таъкид кард, ки пешниҳоди Трамп “иқдоми душманона” нест.
Рубио гуфт:
“Он чизе, ки президент Трамп дирӯз эълон кард, як пешниҳод ва омодагии Иёлоти Муттаҳида барои бар дӯш гирифтани масъулияти барқарорсозии ин минтақа аст.”
Трамп рӯзи сешанбе, ҳангоми истиқболи Бенямин Нетаняҳу, нахуствазири Исроил дар Кохи Сафед, пешниҳоди худро эълон кард, вале ҷузъиёти онро ошкор накард.
Ӯ танҳо ишора намуд, ки ӯ ва дастаи ӯ пешниҳоди мазкурро бо Урдун, Миср ва дигар кишварҳои минтақа баррасӣ кардаанд.
[tajnews_shortlink]
у ддевона аст