Созмонҳои байналмилалии ҳуқуқи инсон, аз ҷумла World Liberty Congress (WLC), бо нашри баёнияе аз Ҳукумати Тоҷикистон хостаанд, ки Рухшона Ҳакимова – рӯзноманигор ва модари ду кӯдак, инчунин дигар мухолифони сиёсиро бидуни қайду шарт озод кунад.

Ба гуфтаи ин созмон, рӯзноманигорӣ ҷиноят нест ва озодии баён яке аз поёни асосии демократия мебошад. Муҳаммадҷон Кабиров, узви Шӯрои роҳбарикунандаи WLC, таъкид кардааст, ки ҷомеаи ҷаҳонӣ набояд дар баробари саркӯби озодии сухан дар Тоҷикистон хомӯш бошад.

Созмонҳои ҳуқуқи башар ҳамчунин аз шарикони байналмилалии Тоҷикистон хостаанд, ки мақомоти кишварро барои поймол кардани ҳуқуқи инсон, озодии матбуот ва мурофиаи одилона ба ҷавобгарӣ кашанд.

Ҳукми Рухшона Ҳакимова ва вокунишҳо

Рӯзи 5-уми феврали 2025, Додгоҳи Олии Тоҷикистон Рухшона Ҳакимоваро бо иттиҳоми хиёнат ба давлат (моддаи 305 Кодекси ҷиноятӣ) ба 8 соли зиндон маҳкум кард.

Ҳамчунин чанд чеҳраи дигари шинохта, аз ҷумла Саидҷафар Усмонзода, Шокирҷон Ҳакимов, Ҳамроҳхон Зарифӣ ва дигарон низ дар доираи парвандаи «табаддулот» маҳкум шуданд. Мухолифони тоҷик ва созмонҳои байналмилалӣ ин ҳукмҳоро сиёсӣ ва беасос арзёбӣ мекунанд.

Мурофиаи Рухшона Ҳакимова комилан пушти дарҳои баста баргузор шуд, ва мақомот ҷузъиёти парвандаро махфӣ нигоҳ доштаанд.

Манбаъҳои наздик ба тафтишот мегӯянд, ки парвандаи Ҳакимова эҳтимолан ба пурсишҳо дар бораи нуфузи Чин дар Тоҷикистон рабт дорад, ва назарҳои баъзе сиёсатмадорон ба ин қазия дохил шудаанд.

Раванди ҳабс ва вазъи оилавии рӯзноманигор

Дар давоми тафтишот, Рухшона Ҳакимова бо сабаби доштани фарзанди ширхора дар озодӣ буд, аммо ҳуқуқи тарки манзил ва тамос бо расонаҳоро надошт.

Пас аз эълони ҳукм, ӯ аз толори додгоҳ боздошт шуд, ва фарзандони ӯ, яке дувунимсола ва дигаре ҳамагӣ 10 моҳа, ба уҳдаи хешовандонаш гузошта шуданд.

Ҳамкасбон ва созмонҳои ҳомии ҳуқуқи инсон аз мақомоти Тоҷикистон талаб доранд, ки қазияи ин рӯзноманигор бозбинӣ шавад, ва ӯ барои нигоҳубини фарзандонаш озод гардад.

Саркуби озодии матбуот дар Тоҷикистон

Ҳукми Рухшона Ҳакимова танҳо як қисми маъракаи саркӯби озодии сухан дар Тоҷикистон мебошад. Тибқи иттилои созмонҳои байналмилалӣ, зиёда аз 10 рӯзноманигори тоҷик барои фаъолиятҳои касбӣ дар зиндон қарор доранд.

Мухолифони тоҷик, аз ҷумла «Гурӯҳи 24», Паймони Миллӣ, ҶИРТ, ҶБЭТ, инчунин созмонҳои Human Rights Watch, Кумитаи шаҳрвандии наҷоти гаравгонҳо ва зиндониёни сиёсӣ (КШНГЗС) ва дигарон ҳукми Ҳакимоваро маҳкум карда, озодии ӯро талаб намудаанд.

Ҷомеаи ҷаҳонӣ ҳанӯз ба ин қазия вокуниши расмӣ нишон надодааст, аммо созмонҳои ҳуқуқи инсон ва намояндагони расонаҳо аз кишварҳои гуногун хостори дахолати фаврии ҷомеаи байналмилалӣ шудаанд.

Short URL: https://smtlink.click/0sebpCopyQR Code