Дабири кулли Созмони Милали Муттаҳид аз гурӯҳи фаластинии “Ҳамос” хостааст, ки ба раҳоии гаравгонҳо идома диҳад. Антонио Гутерриш рӯзи сешанбе дар баёнияе гуфт, азсаргирии хусуматҳо, ки сабаби фоҷиаи бузург хоҳад шуд, бояд пешгирӣ шавад.
Гурӯҳи фаластинии “Ҳамос” рӯзи 10-уми феврал эълон кард, ки раванди раҳоии гаравгонҳоро бозмедорад.
Намояндагони ин гурӯҳ мақомоти Исроилро ба поймоли созиши оташбас дар Ғазза муттаҳам карданд.
Доналд Трамп, раисҷумҳури Амрико ҳушдор дод, ки агар ҳамаи гаравгонҳои исроилӣ то нимрӯзи шанбеи ҳафтаи оянда озод нашаванд, созиши оташбас бекор хоҳад шуд.
«Ҳамос» рӯзи 7-уми октябри соли 2023 ба Исроил ҳамла кард, ки дар натиҷа беш аз 1200 нафар кушта шуданд. Ҳамчунин 200 нафар исроилиро неруҳои “Ҳамос” ба гарав гирифтанд.
Пас аз ин Исроил ба Навори Ғазза ҳамлаи мусаллаҳ оғоз кард, ки дар натиҷа 47 ҳазор фаластинӣ кушта ва даҳҳо ҳазори дигар захмӣ шуданд.
