Додгоҳи федеролии Олмон қарор дод, ки саркашӣ аз хизмати ҳарбӣ бо сабабҳои виҷдонӣ монеаи мутлақ барои истирдод дар парвандаи ҷиноятӣ нест. Ин қарор дар мурофиаи марбут ба истирдоди як шаҳрванди Украина ба мақомоти кишвараш қабул гардид.
Ҷузъиёти парванда:
Тибқи қарори додгоҳ, ҳуқуқ ба саркашӣ аз хизмати ҳарбӣ бо ангезаҳои виҷдонӣ дар ҳолатҳое, ки кишвар ҳадафи таҷовузи мусаллаҳона бо вайрон кардани ҳуқуқи байналмилалӣ қарор мегирад, кафолати мутлақ надорад.
Ин парванда ба як шаҳрванди Украина рабт дорад, ки тибқи иттилои мақомоти тафтишотии Украина, ӯро ба таҳқир, таҳдид ва ҳамла ба корманди ҳифзи ҳуқуқ муттаҳам мекунанд. Тарафи Украина барои истирдоди ӯ пофишорӣ мекунад, хабар медиҳад оҷонсии dpa.
Чаро ӯ аз истирдод метарсад?
Ба гуфтаи айбдоршаванда, дар сурати истирдод ба Украина ӯро метавонанд ба хизмати ҳарбӣ даъват кунанд. Вай изҳор доштааст, ки агар маҷбур шавад, ки силоҳ ба даст гирад ва дар ҷанг касеро бикушад, ин амал ба виҷдони ӯ мухолиф аст.
Муҳлати ҷазо дар Украина:
Агар шаҳрванди Украина дар додгоҳи кишвараш гунаҳкор дониста шавад, ӯро то панҷ соли зиндон интизор аст.
Ин қарор баҳсҳои зиёдеро дар ҷомеа ва байни коршиносони ҳуқуқи инсон барангехтааст. Оё ҳуқуқи виҷдонӣ дар давраи ҷангӣ бояд маҳдуд шавад ё на? — масъалаест, ки ҳанӯз баҳси ҳуқуқшиносон ва ҷомеаи ҷаҳонист.
