Паймони Миллии Тоҷикистон (ПМТ) — эътилофи нерӯҳои мухолифи тоҷик дар хориҷ — Шӯрои нави роҳбарикунандаи худро интихоб намуд. Интихобот рӯзи 1 ноябр дар Варшава баргузор шуда, дар он ҳамаи 13 узви Шӯро (9 ҳузурӣ ва 4 тавассути ваколат) иштирок карданд. Аз миёни 23 номзад, 15 нафар бо овоздиҳии пинҳонӣ интихоб шуданд.
Ин интихоби нав дар пасманзари баҳсҳои дарозмуддат дар бораи самти ҳаракат ва ояндаи оппозитсияи тоҷик сурат мегирад. Дар ду соли ахир фаъолияти Паймон ба сабаби ихтилофҳои дохилӣ, хомӯшии иттилоотӣ ва интиқодҳои ҷомеаи муҳоҷират зери суол қарор гирифта буд. Баъзе фаъолон ва таҳлилгарон Паймонро ба “сустӣ,” “нобоварӣ бо ҷомеа,” ва “фосила аз мардум” муттаҳам мекарданд, дар ҳоле ки ҷонибдоронаш таъкид доштанд, ки дар шароити таъқиби густурдаи сиёсӣ нигоҳ доштани саффи ягонаи оппозитсия муҳимтар аз ҳамлаҳои иттилоотӣ мебошад.
Аъзои нави Шӯро
Тибқи баёнияи расмии ПМТ, ба ҳайати Шӯрои ҷадид шахсони зерин шомил шуданд:
- Абдуманнон Шералиев
- Абубакр Нурӣ
- Алим Шерзамонов
- Бобоҷон Қаюмов
- Илҳомҷон Ёқубов
- Исломҷон Саидов
- Маҳмудҷон Файзраҳмон
- Муҳиддин Кабирӣ
- Неъмат Амонбеков
- Салим Султонзода
- Темур Варқӣ
- Фарҳод Одинаев
- Фатҳуддин Усмонзода
- Шамсиддин Саид
- Шоҳнаим Карим
Интихобот тавассути комиссиони мустақил аз номзадҳо ва аъзои Шӯро сурат гирифт, ки ба гуфтаи ташкилот, ҷараёни овоздиҳӣ ва протоколҳоро назорат дошт.
Ин тағйирот дар ҳоле ба амал омад, ки дар муҳити сиёсӣ ва миёни диаспораи тоҷик саволҳо дар бораи ояндаи Паймон афзоиш ёфта буданд. Хомӯшии тӯлонӣ, ихтилофоти ошкоршудаи қаблӣ ва ҷудошавӣ аз ҷониби баъзе чеҳраҳои сиёсӣ обрӯи Паймонро каме осебдор кард.
Интихоби ҳайати навро нозирони сиёсӣ қадаме барои фаъолсозӣ ва барқарор кардани эътимоди ҷомеаи муҳоҷират арзёбӣ мекунанд. Ҳамзамон, иддае аз фаъолон таъкид доранд, ки ҳузури чеҳраҳои қадимӣ, аз ҷумла Муҳиддин Кабирӣ, метавонад баҳсҳоро дар бораи ислоҳоти дохилӣ ва эҳтиёҷи таҷдиди насл идома бахшад.
Саволи марказӣ ин аст, ки Шӯрои нав то куҷо тавонист барномаҳои амалӣ ро ба роҳ монад — аз ҷумла:
- наздик шудан ба ҷомеаи муҳоҷират,
- эҷоди иртиботи мустақим бо фаъолнокони ҷиноятҳои сиёсӣ ва журналистони мустақил,
- пешниҳоди стратегияҳои равшан барои муборизаи сиёсӣ,
- фишангҳои байналмилалӣ барои озодии зиндониёни сиёсӣ,
- ва таъмини равшанӣ ва шаффофият дар фаъолият.
Дар шароите ки Тоҷикистон бо фазои бастаи сиёсӣ, таъқиби фаъолони мустақил ва пахши ҳар гуна садои интиқодӣ рӯ ба рӯ аст, коршиносон таъкид доранд, ки нақши оппозитсияи беруни кишвар метавонад ҳассос ва ҳалкунанда бошад.
Шоҳиди ҳодисаи муҳим шудед?
Иттилоъ, акс ё видео фиристед — маводҳо махфона баррасӣ мешаванд.
