Рӯзи 15-уми феврал дар шаҳри Фарнворти Болтон (наздик ба Манчестер)-и Бритониё мусобиқаи муҳорибавии Elite Combat Championship 2 (ECC 2) баргузор шуд. Дар ин мусобиқаи бонуфузи варзишҳои омехта (MMA) варзишгари ҷавони тоҷик Ғиёсуддин Саидов бо ҳунари баланди худ иштирок намуда, бо шикастани дасти рақибаш ғалабаи мутлақ ба даст овард.
Муборизаи Ғиёсуддин ва ғалабаи ӯ бо шикастани дасти рақиб
Ғиёсуддин Саидов, ки ҳамагӣ 17 сол дорад, дар рақобати вазни шартӣ (catchweight bout) бо варзишгаре бо номи Галлант вориди октагон шуд. Дар ин муҳорибаи шадид, ӯ бо истифода аз техникаи дастгиркунӣ (submission hold) рақибашро маҷбур сохт, ки муҳорибаро қатъ кунад. Ҳангоми иҷрои ин техника, дасти Галлант шикаст, ва Ғиёсуддин бо усули дастшикастан пирӯзии худро таъмин намуд.
Ки ҳаст Ғиёсуддин Саидов?
Ғиёсуддин Саидов фарзанди Маҳмазариф Саидов мебошад, ки узви ҲНИТ буда, аз соли 2015 дар ҳиҷрат қарор дорад. Падари ӯ ҳоло дар Бритониё ҳамчун паноҳандаи сиёсӣ зиндагӣ мекунад ва ҳамеша пуштибони писараш дар варзиш аст.
Пеш аз муҳориба, Маҳмазариф Саидов дар саҳифаи Фейсбуки худ бо даъват ба дӯстони худ дар Бритониё навишта буд:
“Агар касе аз дӯстони дар Бритониё буда мехоҳад дар мусобиқаи писарам Ғиёсуддин ширкат кунад, рӯзи шанбеи оянда метавонад ташриф биёрад. Иштирок озод аст, чиптаҳо дар даромадгоҳи биное, ки мусобиқа баргузор мегардад, фурӯхта мешаванд.”
Инчунин, худи Ғиёсуддин дар шабакаҳои иҷтимоии Инстаграм ва Фейсбук видео ва аксҳое нашр карда буд, ки дар онҳо парчами Тоҷикистон баланд карда шуда, ҳамзамон сурудҳои тоҷикӣ садо медоданд.
Мусобиқаи ECC 2 – майдони истеъдодҳои нав
Elite Combat Championship (ECC) яке аз мусобиқаҳои муҳими варзишҳои омехта (MMA) мебошад, ки барои варзишгарони ҷавон ва умедбахш имкони нишон додани истеъдоди худро фароҳам меорад. Ин мусобиқа дар The Hideout, Farnworth, Bolton баргузор шуд ва варзишгарон аз кишварҳои гуногун дар он иштирок карданд.
Дарҳои толор соати 16:00 кушода шуда, муҳорибаи аввал аз соати 17:00 оғоз ёфт. Чиптаҳо бо нархи £35-£55 ба фурӯш рафтанд.
Парчамбардори Тоҷикистон дар саҳнаи ҷаҳонӣ
Ғиёсуддин Саидов, ки дар синни 7-солагӣ аз Тоҷикистон муҳоҷират кардааст, бо заҳмат ва талошҳои худ тавонист дар яке аз кишварҳои тараққикардаи ҷаҳон – Бритониё – ба чунин сатҳи баланди варзишӣ расад. Ӯ бо ифтихор парчами Тоҷикистонро баланд бардошт, ки ин далели ватандӯстии ӯ ва тарбияи дурусти падару модараш мебошад.
Дар ҳоле ки ҳукумати Тоҷикистон варзишгарони тоҷикро ба таври бояду шояд дастгирӣ намекунад, чунин ҷавонон бо азму иродаи худ дар хориҷ аз кишвар парчами Тоҷикистонро боло мебаранд ва номи миллати тоҷикро дар арсаи ҷаҳонӣ муаррифӣ мекунанд.
Гуруҳи TajNews бо доштани чунин ҳамватани пурталош ифтихор намуда, ба Ғиёсуддин муваффақиятҳои бештар таманно дорад. Ҳамзамон, ба падару модари ӯ барои тарбияи чунин фарзанди миллатдӯст миннатдорӣ баён мекунад.
Ғалабаҳои фарзандони мухолифони тоҷик
Ин нахустин ҳолат нест, ки фарзандони мухолифони тоҷик дар варзишҳои ҷаҳонӣ муваффақ мешаванд. Соли гузашта, Муҳаммадиқболи Садриддин, яке аз мухолифони сарсахти ҳукумати Тоҷикистон, низ аз пирӯзии писараш Ҳузайфа дар мусобиқаи Фаронса хабар дода буд.
Ӯ навишта буд:
“Худоро шукр мегӯям, писарам Ҳузайфа имрӯз (27.04.2024) дар рақобатҳои дохилии давлати Фаронса, ки дар шаҳри Тулуз баргузор гардид, дар вазни 52 кг сазовори ҷойи аввал ва қаҳрамони Фаронса гашт…”
Ҳамзамон, фарзандони дигари мухолифони тоҷик низ дар намудҳои гуногуни варзишӣ ҷойҳои баланди ҷаҳониро соҳиб мешаванд.
Ғиёсуддин Саидов – на танҳо як варзишгари ҷавон, балки намоди азму ирода ва ватандӯстии тоҷикон мебошад. Бо вуҷуди зиндагӣ дар муҳоҷират, ӯ парчами Тоҷикистонро дар арсаи варзишии Бритониё баланд бардошт ва собит сохт, ки ҷавонони тоҷик бо ҳунар ва истеъдоди худ метавонанд дар сатҳи ҷаҳонӣ муваффақ шаванд.
Музаффарият муборак, Ғиёсуддин!
Больше на Хабарҳои Тоҷикистон – Садои мустақили мардум
Subscribe to get the latest posts sent to your email.