Мақомот муҳлати ҳабси Абдураҳим Восиев, узви созмони “Ҷавонон барои эҳёи Тоҷикистон”-ро ҳафт соли дигар дароз кардаанд. Бо ин тасмим, муҳлати умумии зиндони ӯ ба 30 сол расид. Восиев, ки соли 2017 дар Русия нопадид ва баъдан дар Тоҷикистон ба 23 соли зиндон маҳкум шуда буд, ҳоло дубора мавриди муҳокима қарор гирифтааст.
Абдухалил Восиев, бародари Абдураҳим, рӯзи 7-уми март ба Радиои Озодӣ гуфт, ки хабари дароз шудани муҳлати ҳабси бародарашро шунидааст, вале сабабҳои ин тасмимро намедонад. Ӯ афзуд, ки мақомот ҳанӯз шарҳи расмӣ надодаанд ва талошҳо барои гирифтани иттилооти бештар натиҷа надодаанд.
Ба гуфтаи Абдухалил, бародарашро аз зиндони шаҳри Ваҳдат ба Боздоштгоҳи рақами аввал дар Душанбе интиқол додаанд. «Ба нома ва суолҳо посух намедиҳанд. Мо намедонем, ки чаро муҳлати ҳабсро ҳафт соли дигар дароз карданд. Як шахси боэътимод ва огоҳ аз вазъ гуфт, ки парвандаи нав кушодаанд, вале ҷузъиёти дақиқ маълум нест,» — мегӯяд Абдухалил.
Абдураҳим Восиев соли 2017 дар Русия нопадид шуд ва баъдан маълум гардид, ки ӯро ба Тоҷикистон бурдаанд. Дар ҳамон сол, ӯро бо иттиҳоми узвият дар созмони мамнӯъ ва фаъолиятҳои зиддидавлатӣ ба 23 соли зиндон маҳкум карданд.
То ҳол мақомоти Тоҷикистон шарҳи расмии ин ҳодисаро надодаанд. Ҳамчунин, маълум нест, ки парвандаи нав бар кадом асос ва бо чӣ иттиҳоме боз шудааст. Мақомот ва намояндагони Идораи зиндонҳои Тоҷикистон низ дар ин маврид хомӯшӣ ихтиёр кардаанд.
Мушоҳидон ва ҳомиёни ҳуқуқ ин тасмимро ҳамчун идомаи фишор ба мухолифон арзёбӣ мекунанд. Онҳо мегӯянд, ки идомаи ҳабси Восиев метавонад ба вазъи сиёсӣ ва ҳуқуқии Тоҷикистон таъсири ҷиддӣ гузорад.
Бо таваҷҷуҳ ба номуайянии сабабҳои дароз шудани муҳлати ҳабс ва хомӯшии мақомот, ин масъала метавонад дар маркази таваҷҷуҳи созмонҳои байналмилалии ҳомии ҳуқуқ ва ҷомеаи шаҳрвандӣ қарор гирад.
