Тоҷикистон дар Созмони Милали Муттаҳид (СММ) бо пешниҳоди қатънома оид ба зеҳни сунъӣ (ИИ) ташаббус нишон дод. Ҳамоиши мазкур дар қароргоҳи СММ дар шаҳри Ню-Йорк баргузор гардид, ки дар он ҳайати баландпояи Тоҷикистон ширкат варзиданд.
Дар ин ҳамоиш Тоҷикистонро Шералӣ Кабир, вазири саноат ва технологияҳои нав, Хуршед Мирзо, директори Агентии инноватсия ва технологияҳои рақамӣ дар назди Президенти Ҷумҳурии Тоҷикистон ва Ҷонибек Ҳикмат, намояндаи доимии Тоҷикистон дар СММ намояндагӣ карданд.
Тибқи маълумоти расида, яке аз унсурҳои асосии ин қатънома ташкили Маркази минтақавии зеҳни сунъӣ ва дастгирии стартапҳо дар минтақаи Осиёи Марказӣ мебошад. Ин иқдом ба рушди технологияҳои нав, мусоидат ба ҳамкориҳои илмӣ ва ҷалби сармоягузориҳо дар соҳаи зеҳни сунъӣ равона шудааст.
Ҳадафи асосии ташаббуси Тоҷикистон ин аст, ки зеҳни сунъӣ дар минтақа бо назорати зарурӣ ва бо риояи стандартҳои байналмилалӣ рушд ёбад. Тоҷикистон бо пешниҳоди ин қатънома талош дорад, ки замина барои истифодаи босамар ва бехатари технологияи зеҳни сунъӣ фароҳам оварда шавад.
Бар пояи изҳороти намояндагони Тоҷикистон, қабули ин қатънома ба ҳамоҳангии бештари кишварҳои Осиёи Марказӣ дар соҳаи зеҳни сунъӣ, тақвияти ҳамкорӣ ва мубодилаи таҷриба дар ин бахш мусоидат хоҳад кард.
Қатънома ҳанӯз дар марҳилаи баррасӣ қарор дорад ва интизор меравад, ки дар ояндаи наздик аз ҷониби аъзои СММ баррасӣ ва тасдиқ гардад.
