Кумитаи тафтишотии Русия таҳқиқоти наверо дар робита ба соҳиб шудани як хонаводаи ниёзманди тоҷик ба манзил дар Ҷумҳурии Тотористон оғоз кардааст.
Рӯзи 3-юми марти соли 2025 шаҳрдории шаҳри Нижнекамски Тотористон ба Муҳиддин Холзода, зодаи Тоҷикистон ва хонаводааш манзил тақдим кард. Дар ин бора шаҳрдори шаҳр Рамил Мулин дар саҳифаи худ дар шабакаи иҷтимоии “ВКонтакте” хабар дода буд. Ин иқдом вокунишҳои тунду тези сокинони маҳаллӣ ва корбарони шабакаҳои иҷтимоии Русияро ба вуҷуд овард.
Пас аз интишори ин хабар, гурӯҳе аз сокинони маҳаллӣ аз Кумитаи тафтишотии Русия талаб карданд, ки масъалаи воқеан ниёзманд будани ин хонаводаи тоҷик таҳқиқ шавад. Раиси Кумитаи тафтишотии Русия Александр Бастрикин изҳор дошт, ки таҳқиқот дар ин замина оғоз шудааст.
Тақдими манзил ба хонаводаи Холзода боис ба интиқоди сахт ва ҳатто таҳқири мақомот аз тарафи корбарони шабакаҳои иҷтимоӣ шуд. Ин вокунишҳо ба ҳадде расиданд, ки шаҳрдор Рамил Мулин маҷбур шуд бахши шарҳҳоро дар зери паёми худ ғайрифаъол кунад.
Айни ҳол Кумитаи тафтишотии Русия сабабҳои тақдими манзил ба ин хонавода ва далелҳои эҳтимолии сӯиистифода аз мансабро мавриди санҷиш қарор додааст. Мақомот мегӯянд, ки натиҷаҳои таҳқиқотро дар наздиктарин фурсат эълон хоҳанд кард.
Больше на Хабарҳои Тоҷикистон – Садои мустақили мардум
Subscribe to get the latest posts sent to your email.