Ба гузориши TajNews, мақомот дар Душанбе беш аз 20 сокини маҳаллаи “Дарвоз”-и ноҳияи Фирдавсиро боздошт намудаанд. Манобеи Радиои Озодӣ мегӯянд, ки аксари боздоштшудаҳо сокинони ҷамоати Язгуломи ноҳияи Ванҷ мебошанд.
Бино ба маълумоти дастрасшуда, як қисми боздоштҳо рӯзи 9-уми март ҳангоми маросими дафни як сокини маҳалла сурат гирифта, дигаронро аз манзилҳояшон бурдаанд.
Пайвандони боздоштшудаҳо, ки нахостаанд номашон зикр шавад, гуфтаанд, ки бо гузашти чанд рӯз то ҳол аз ҳолати фарзандонашон хабаре надоранд ва мақомот низ шарҳе дар бораи сабабҳои боздошт ироа накардаанд.
То кунун мақомоти Тоҷикистон расман сабаби боздошти ин сокинонро шарҳ надодаанд. Ин дар ҳолест, ки дар гузашта низ ҳолатҳои боздошти гурӯҳии сокинони Язгулом мушоҳида шудааст. Аз ҷумла, дар моҳи майи соли 2024, Azda.tv гузориш дода буд, ки дар водии Язгуломи Вилояти Мухтори Кӯҳистони Бадахшон амалиёти вижаи мақомоти қудратӣ баргузор гардида буд.
Боздошти ахир боиси нигаронии пайвандон ва ҷомеа гардидааст. Дар шабакаҳои иҷтимоӣ низ баҳсҳо дар ин замина авҷ гирифтаанд.
