Дар шаҳри Андиҷони Ӯзбекистон нисбати як мансабдори давлатӣ парвандаи ҷиноӣ боз шудааст, ки дар ҷараёни рӯзи корӣ ба истифодаи маводи мухаддир муттаҳам мешавад.
Тибқи иттилои расонаҳои маҳаллӣ, раиси шӯъбаи шаҳрии Вазорати коҳиши сатҳи фақр ҳангоми будубош дар утоқи корӣ бо бонги худсохт (маъруф бо номи “бульбулятор”) гашиш кашидааст. Аксҳо ва видеоҳои ин ҳолат дар шабакаҳои иҷтимоӣ паҳн шуда, баҳси густардаеро ба вуҷуд оварданд.
Навор нишон медиҳад, ки ин шахси масъул дар соати корӣ, бидуни ҳеҷ нигаронӣ, бо истифода аз банкае ба истеъмоли моддаи мамнӯъ машғул аст. Пас аз пахши ин мавод, вазорати корҳои дохилии Ӯзбекистон тафтишоти таъҷилӣ роҳандозӣ карда, дар ҷараёни кофтукоб аз утоқи кори мансабдор 0,69 грамм гашиш пайдо кардааст.
Ба зидди ӯ парвандаи ҷиноӣ боз гардида, дар ҳоли ҳозир таҳқиқот идома дорад. Номи ӯ ҳанӯз расман эълон нашудааст.
Ин ҳодиса дар пасманзари талошҳои идомадори мақомоти Ӯзбекистон барои мубориза бо фасод ва маводи мухаддир сурат гирифта, хашму нигаронии ҷомеаро ба бор овардааст. Шабакаҳои иҷтимоӣ ин амалро ҳамчун “беэҳтиромӣ ба вазифа ва мардум” тавсиф кардаанд.
Мақомот мегӯянд, интизор меравад, ки нисбати вай тадбирҳои сахти қонунии интизомиву ҷиноӣ андешида шаванд.
