Дар шаҳри Пятигорски Русия як амали террористие, ки қарор буд рӯзи 16 апрел дар ҷараёни консерти ҳаҷвнигори шинохта Павел Воля сурат бигирад, пешгирӣ гардид.
Бино ба иттилои манбаъҳои амниятӣ ва канали хабарии “112”, Исроилҷон Қурбонов, ҷавони 24-солаи зодаи Тоҷикистон, дар нақша дошт бо истифода аз “коктейли Молотов” Қасри фарҳанги “София”-ро ҳангоми консерт оташ занад.
Тафтишот муайян кардааст, ки Қурбонов бо аъзои гурӯҳи террористии “Давлати Исломӣ” (созмони мамнӯъ дар Русия) дар тамос буда, бо дастури онҳо се маводи таркандаи сӯхторӣ омода намудааст.
Як ҳафта қабл аз санаи ҳамла, ӯ ба Қасри фарҳанг рафта, акс ва видео гирифтааст ва онро барои “куратор”-ҳои худ фиристодааст.
Бо амалиёти фаврии мақомоти амниятӣ, рӯзи гузашта ӯ боздошт гардид. Дар манзили зисташ маводи сӯхторӣ, кордҳо ва як табар пайдо шудааст.
Нисбати Қурбонов бо банди “Омодагӣ ба амали террористӣ” парвандаи ҷиноӣ оғоз шудааст.
Консерти Павел Воля, ки бояд дар ҳамин рӯз баргузор мегардид, бо эълони “мушкилоти техникӣ” лағв карда шуд. Вале маълумоти манбаъҳо нишон медиҳад, ки сабаби аслии лағви консерт — хатар ба амнияти ҷамъиятӣ будааст.
Мақомоти Русия айни ҳол робитаҳои эҳтимолии гумонбарро бо дигар аъзои гурӯҳҳои террористӣ таҳқиқ доранд.
