Дар нахустин рӯзи соли нав дар микроноҳияи 46-уми пойтахт ҳодисаи нохуш рух дод – кӯдак ба колодеци бесарпӯш афтид. Хушбахтона, бо кумаки сариваќтии роҳгузарон ӯро наҷот доданд.
Тибқи иттилои падари кӯдак, ҳодиса тахминан соати 17:00 рух додааст. «Колодес дар назди гузаргоҳи пиёдагард воқеъ буда, тамоман бесарпӯш аст. Агар роҳгузарон кумак намекарданд, оқибати ин ҳодиса метавонист фоҷиавӣ шавад», – изҳор дошт ӯ.
Мутахассисон таъкид мекунанд, ки мавҷудияти колодецҳои бесарпӯш дар кӯчаҳои пойтахт хатари ҷиддӣ барои ҳаёти сокинон, махсусан кӯдакон мебошад. Ин масъала дар фасли зимистон боз ҳам хатарноктар мегардад, зеро барф метавонад колодецҳои кушодаро пӯшонад.
Сокинони пойтахт изҳори нигаронӣ мекунанд, ки:
– Колодесҳои бесарпӯш дар ҷойҳои серодам вомехӯранд
– Сарпӯшҳои колодецҳо ё вуҷуд надоранд ё шикастаанд
– Назорати мунтазами ҳолати колодесҳо аз ҷониби мақомоти марбута ба роҳ монда нашудааст
Мутахассисони соҳаи хоҷагии манзилию коммуналӣ мегӯянд, ки сарпӯши колодесҳо бояд:
– Мустаҳкам бошанд
– Ба таври доимӣ санҷида шаванд
– Дар сурати вайрон шудан фавран иваз карда шаванд
Мувофиқи қонунгузорӣ, назорати ҳолати колодесҳои коммуналӣ ва сарпӯшҳои онҳо ба зиммаи хадамоти коммуналии шаҳр вогузор шудааст.
TajNews барои шарҳи ҳодиса ба Раёсати хоҷагии манзилию коммуналии шаҳри Душанбе муроҷиат намуд. То лаҳзаи нашри хабар аз ин ниҳод посухе дарёфт нашуд.
Тавсияҳо барои шаҳрвандон
Коршиносон ба сокинон тавсия медиҳанд:
– Ҳангоми роҳ рафтан эҳтиёткор бошанд
– Кӯдаконро дар кӯча таҳти назорат гиранд
– Дар бораи колодецҳои бесарпӯш ба мақомоти дахлдор фавран хабар диҳанд
