Гурӯҳи тафтишотии муштараки таъсисёфта барои таҳқиқи ҳавопаймои малайзиягии Boeing-777, ки моҳи июли соли 2014 дар Донбаси Украина ҳадаф қарор гирифта буд, эълон кард ин ҳавопаймо аз силоҳи “Бук”-и русӣ, мутааллиқ ба горди зидимушакии 53-уми дифоъи зиддиҳавоии нерӯҳои мусаллаҳи Русия ҳадаф қарор гирифтааст.
Далоили ин ҳамла ҳангоми ҳисоботе, ки намояндаи ин гурӯҳ Уилберт Паулсен дар додгоҳи Гаага ироа мекард, ба намоиш гузошта шуданд.
“Мо тамоми аксу наворҳои дастрасшударо таҳқиқ кардем, ба мо муяссар шуд изи ангуштонро аз снаряде, ки ҳавопайморо зада буд, гирем. Мо ба ин назарем, ки ин снарядҳо бо онҳое, ки ба гордҳои ҳарбии Русия таъаллуқ доранд, мутобиқат мекунанд” — гуфт ӯ.
Гуфтанист, 17 июли соли 2014 дар фазои вилояти Донетски Укроин ҳавопаймои мусофирбари Boeing-777, мутааллиқ ба «Malaysia Airlines», ки дар хати Амстердам — Куала-Лумпур дар ҳоли парвоз буд, ҳадаф қарор гирифта, суқут кард. Дар натиҷа 298 нафар, аз ҷумла кӯдакон ҷони худро аз даст доданд.
Шоҳиди ҳодисаи муҳим шудед?
Иттилоъ, акс ё видео фиристед — маводҳо махфона баррасӣ мешаванд.
