Даргириҳои шадид дар Қундузи Афғонистон сабаб гаштааст, ки ҳазорҳо нафар аз аҳолии таҳҷоии ин минтақа хонаву дари худро партофта ба ҷойҳои амнтаре бигрезанд.
Созмони милали муттаҳид мегуяд, дар ҳашт рӯзи охир аз вилояти Қундуз 33 000 нафар фирор кардаанд. СММ аз вазъи ба амаломада изҳори нигаронӣ намудааст ва ҷонибҳоро ба оташбас даъват сохтааст. Гуфта мешавад, ки даргириҳо миёни ҷангиёни Толибон ва нерӯҳои ҳукуматӣ ҳанӯз идома доранд ва он 3 юми октябр шурӯъ шуда буд. Толибон аз чаҳор самт ба Қундуз ҳамлавар гаштанд ва шаҳрро бо як ҳамла аз дасти ҳукумат гирифтанд.
Бино бар хабарҳо аҳолии ин шаҳр аз камбудии оби ошомиданӣ, дору ва ғизову нерӯи барқ азият мекашанд, ки ноамниҳи рӯзҳои охир ин мушкилро ба сари онҳо бор намудааст. Назар ба маълумоти Вазорати умури гурезаҳои Афғонистон, дар натиҷаи даргириҳои шадид миёни Толибон ва нерӯҳои низомии Кобул вилояти Қундузро зиёдтар аз 100 000 нафар тарк карда, ба минтақаҳои нистабан ороми Афғонистон гурехтаанд.
Гуфта мешавад, дар сафи Толибон тоҷикону ӯзбакон низ кам нестанд ва онҳо шомили созмони “Ансоруллоҳ” ва Ҳаракати исломии Ӯзбакистон мебошанд.
Мақомоти Тоҷикистон мегӯянд, нерӯҳои марзбонии кишвар бо шурӯи ноамниҳо дар Қундузи бо Тоҷикистон ҳаммарз ба ҳоли омодабош оварда шудаанд, аммо то ҳанӯз аз ҷониби размандагони Толибон тахриби марз ва ё ягон амали ифодагари хатари таҷовуз ба мушоҳида нарасидааст ва минтақаи сарҳадӣ таҳти назорати шадиди марзбонони тоҷик қарор дорад.
