Ин хабар аз ҷониби Эътилофи зидди шиканҷаи Тоҷикистон расида, дар он гуфта мешавад, як зани 34 сола, ки сокини шаҳри Душанбе будааст, мавриди зӯровариҳои милисаи ноҳияи Шоҳмансури пойтахт қарор гирифтааст.
Таъкид мегардад, ин зан корманди як созмони байналмиллалӣ буда, аммо ба сабабҳои номаълум номи ин созмон қайд нашудааст. Милисаҳои ноҳияи Шоҳмансур ҳангоми гузаронидани чорабинии бо номи “Нелегал” ба манзили ин хонум меоянд ва бо зӯрӣ ба хонаи вай дохил мегарданд.
Милисаҳо дар пайи гузаронидани чорабинии “Нелегал” шиносномаҳои шаҳрвандонро месанҷанд ва ҳадаф аз баргузории ин санҷишот ошкор кардани вуҷуди мардуми хориҷа дар Душанбе мебошад, ки бидуни асноди зарурӣ буду бош доранд. Хонуми мазкур ҳарчанд шиносномаи худро ба милисаҳо тақдим месозад, аммо онҳо бо истифода аз зӯрӣ ба хонаи ин зан медароянд. Соҳибхона ин амали милисаҳои зӯроварро мехоҳад дар телефони мобилии худ сабт намояд, аммо кадоме аз милисаҳо телефонро аз дасти ӯ кашида гирифта ва худи ӯро аз мӯйҳояш доштаву мавриди лату кӯб қарор медиҳад. Пас милисаҳо вайро кашон -кашон аз зинаҳо поин меоранд. Ин ҳангом ба доду фиғони ин хонум касе аз ҳамсоягон, ки тамошобин будаанд, намерасанд ва милисаҳо ҳамроҳи меҳмонони дар хонабуда ин занро ба як мошини шишасиёҳ савор карда, ба шӯъбаи умури дохилаи ноҳияи Шоҳмансур интиқол медиҳанд. Он ҷо низ милисаҳо боздоштшудагонро ба тазйиқ меоранд ва пас аз забонхат гирифтан дар бораи он, ки ба милисаҳо эроде надоранд, баъди чаҳор соат, нимаҳои шаб раҳо месозанд.
Эътилофи зидди шиканҷаи Тоҷикистон ҳамчунин иттилоъ додааст, ки ба ин хонуми ҷабрдида кӯмаки ҳуқуқӣ расонда аст ва барои дифоъ аз ҳуқуқҳояш бо вакили мудофеъ ҳам таъмин намудааст.
Ҳодисаи лату кӯби шаҳрвандон дар идороти ҳифзи ҳуқуқи Тоҷикистон як воқеаи маъмулӣ аст ва дар натиҷаи шиканҷаи милисаҳо садҳо нафар ҷабр мебинанд. Ҳатто ҳодисаҳое ҷой доранд, ки ашхоси мавриди боздоштгардида аз шиканҷаи милисаҳо якумрӣ ногирон шуда ва доди худро ба касе гуфта натавонистаанд. Лату кӯб усули дӯстдоштаи милисаҳои тоҷик ба шумор меравад ва барои тарсонидану гирифтани оташи чашми шаҳрвандон ба кор бурда мешавад, то онҳо бифаҳманд, ки ҳукумат қудратманд аст ва алайҳи “саркашону ноқобилон” ба ҳар кор қодир мебошад
