Сардори хадамоти тиббии яке аз қисмҳои ҳарбии Вазорати дифоъ ба гумони даст доштан дар қаллобӣ боздошт шуд.
Дар ин бора дафтари матбуотии Агентии назорати давлатии молиявӣ ва мубориза бо коррупсияи Тоҷикистон хабар дода навишт, як марде ба ин сохтор муроҷиат карда, гуфтааст, ки сардори хадамоти тиббӣ Гулнора Кенҷаева барои аз адои хизмати ҳарбӣ озод намудани хешаш аз ӯ маблағи 30 ҳазор сомонӣ (2910 доллар) талаб кардааст.
Гуфта мешавад, худи ҳамон рӯз зимни гузаронидани чорабиниҳои оперативӣ-тафтишотӣ Гулнора Кенҷаева баъди аз шаҳрванд гирифтани маблағи 30 ҳазор сомонӣ боздошт шуда, маблағи мазкур аз ӯ ҳамчун далели шайъӣ дарёфт ва гирифта шудааст.
Вобаста ба ҳолати мазкур нисбати боздоштшуда бо моддаи 247, қ. 3, банди “а” Кодекси ҷиноятии Тоҷикистон (Қаллобӣ) парвандаи ҷиноятӣ оғоз карда шуда, тафтиши пешакии он идома дорад.
Қобили зикр аст, ки дар ин модда то 12 соли зиндон бо маҳрум шудан аз ишғоли вазифаҳои муайян ё машғул гардидан ба фаъолияти муайян ба муҳлати то панҷ сол ҷазо пешбинӣ шудааст.
Шоҳиди ҳодисаи муҳим шудед?
Иттилоъ, акс ё видео фиристед — маводҳо махфона баррасӣ мешаванд.
