Хуруҷи каронавируси навъи нав ё “вируси бритонӣ” дар як қатор аз кишварҳои ҷаҳон, сабаби мутаваққиф шудани сафари шаҳрвандон барои адои Умра шудааст
Қарор буд, дар нимаҳои дуюми моҳи январи соли ҷорӣ аввалин гурӯҳи шаҳрвандони Тоҷикистон ба умра раванд, аммо бо сабаби хуруҷи каронавируси навъи нав ё “бритонӣ” сафар ба таъхир монда шудааст.
Хабаргузории Спутник тоҷикистон бо истинод аз қавли Абдулмаҷид Зокиров, масъули ширкати сайёҳии «Расулсохтмон» навишт, ки кишвари Арабистони Саудӣ дар бораи чунин таъхиргузорӣ дар қабули зиёраткунандагон, рӯзи гузашта аз тариқи расонаҳои ахбори умум эълон кардааст.
Ба гуфти намояндаи “Расулсохтмон” “Хуруҷи “вируси бритонӣ” масъулини кишвари Арабистони Саудиро андаке ба ташвиш гузоштааст, онҳо аз нав дарҳоро бастаанд. Ҷониби Арабистон тавассути расонаҳои ахбори умум иттилоъ нашр кардаанд, ки аз охирҳои моҳи март ба қабули зиёраткунандагон шурӯъ хоҳанд кард”.
Масъулони Вазорати Ҳаҷҷи Арабистони Саудӣ баъди таъхири чандвақта, моҳи декабри соли гузашта эълон намуда буданд, ки сар аз моҳи 6 уми солшумории қамарӣ, ки ба нимаҳои дуюми моҳи январи соли 2021 рост меояд, ба қабули шаҳрвандони Тоҷикистон, барои зиёрати шаҳрҳои муқаддаси Ислом — Маккаи мукаррама ва Мадинаи мунаввара шурӯъ мекунанд.
Абдулмаҷид Зокиров иброз намуд, ки сафарбаршавии сокинон барои умра аз қабули масъулини Арабистони Саудӣ вобаста аст, бо сабаби вазъи беҳдоштӣ мутафаққиф мешавад.
Сафарбаршавии сокинони кишвар барои умра аз суи ширкатҳои сайёҳии «Расулсохтмон» ва «Ормон» роҳандозӣ мешавад. Вазорати Ҳаҷҷи кишвари Арабистон синну соли зиёраткунандаҳоро бо сабаби хуруҷи бемории ҳамагири COVID-19, маҳдуд намуда эълон намуд, ки танҳо, барои аз 18 то 50 — солаҳо барои сафар ба ин кишвар иҷозат дода мешавад.
Моҳи ноябри соли 2020 баъди таваққуфи чандмоҳа Арабистони Саудӣ феҳрасти кишварҳоро нашр кард, ки сафари шаҳрвандони онҳо дар ин кишвар рухсат шудааст.
Дар ин руйхат кишварҳои қораи Осиё, мисли Тоҷикистон, Қазоқистон, Ӯзбекистон, Чин, Туркия, Озарбойҷон ва давлати Белорус шомил буданд.
Сафари шаҳрвандони давлатҳои Эрон, Миср, Қатар, Италия Қирғизистон, Кувейт, Русия, Англия ва Иёлоти Муттаҳидаи Амрико барои ба умра ба таври муваққат манъ гуфта мешуд.
Нимаҳои моҳи декабри соли 2020 табибон дар бораи сирояти навъи ҷадиди коронавирус дар кишварҳои Британия иттилоъ дода гуфтанд, ки вируси мазкур аз COVID-19 наздики 70 дарсад хавфноктар аст ва суръати паҳншавии он низ бамаротиб фарқ мекунад.
Дар гузашта аз Тоҷикистон ҳазорҳо нафар, барои зиёрати маконҳои муқаддаси Ислом ба кишвари Арабистони Саудӣ сафар мекарданд.
Шоҳиди ҳодисаи муҳим шудед?
Иттилоъ, акс ё видео фиристед — маводҳо махфона баррасӣ мешаванд.
