Ба фарқ аз ҳама идҳо Рамазон ва Қурбон, ки ду ҷашни асосии мусалмонон ба шумор мераванд, то ҳол дар Федератсия Руссия рӯзи истироҳати саросарӣ эълон нагардидааст.
Ин аст, ки мусалмонони ин кишвар бо роҳандозии як чорабинии густарда ба ҷамъоварии имзо дар сар то сари Руссия иқдом намуданд ва аз Владимир Путин дархост ба амал овардаанд, ки рӯзҳои иди Рамазон ва Қурбонро дар сатҳи қукуматӣ истироҳат эълон намояд. Ислом дини дуюмине аст, ки аз нигоҳи шумораи пайравонаш дар қаламрави ин кишвар мақоми хос дорад ва назар ба омори соли 2002 теъдоди мардуми мусалмон дар Руссия 14,5 миллион ҳисоб мешавад. Айни ҳол шумораи мусалмонон дар ин қаламрав як баробар афзуда, тақрибан ба 20 дарсади шумораи умумии аҳолии Руссия баробар шудааст.
Дархост аз Путин дар ин бора ба шакли хаттӣ сурат гирифта, таъкид мегардад, ки мусалмонони қаламрави Қрим, Тотористон, Башқордистон, Адигей, Доғистон, Ингушистон, Карачаево-Черкесии, Чеченистон ва Кабардино-Балкария ҳаққи истироҳати расмӣ дар рӯзҳои иди мусалмононро пайдо кардаанд, аммо пайравони ислом дар дигар шаҳру навоҳии Руссия мутаассифона аз он дар канор мондаанд.
