Орзу Исоев яке аз равшанфикрони тоҷик дар саҳифаи фейсбукии худ дар бораи муҳоҷират ва зиндагии имрӯзи зану марди тоҷик навиштаеро нашр кардааст, ки таваҷҷуҳи хелеҳоро ба худ кашидааст. Ӯ ҳисоб карда мегӯяд зани тоҷик дар тули 36 соли зиндагии оилавиаш танҳо 3 сол дар оғуши шавҳараш аст ва боқии умрашро дар танҳоиву интизор мегузаронад. Инак навиштаи Орзуро пешкаши шумо менамоем.
Қиссаи пурдарди Доро Суҳроби бобати бозгашти падараш аз ҳиҷрат такони сахти равониям дод. Маҷбурам, ки як омори инфиродиямро пешоруи ҷаноби Зиндагӣ бигзорам, то шумоҳо низ ба аъмоқи масъала фуру равед.
Бубинед, як марди муҳоҷир дар имтидоди як сол фақат як бор имкон дорад, ки ба пеши хонуми худ баргардад. Ин мард на кам, на беш, тақрибан як моҳ канори хонумаш мемонад ва боз 11 моҳи тулонӣ сар ба куи ғурбат мезанад. Агар 12 сол бад-ин минвол гузарад, аз руи ҳисобҳо танҳо 1 соли ҳамоғушиву ҳамбистарии мард бо хонумашро ташкил медиҳад. Марди 20 сола агар то 56 солагӣ дар ҳиҷрат бошад, пас тули 36 соли ҳаёти оилавӣ ҳамагӣ 3 СОЛ канори хонумаш мемондаасту бас! Ҳазор офарини зани тоҷик! Ҳазор таҳсини марди тоҷик! Хазорон ҳамд бар он кудаки падардори бепадар.
…боре як рузноманигор аз ман суол кард, ки чӣ нафаре улгуи ман дар ҷодаи сиёсат ва умуман дар ҳаёт аст. Ман гуфтам, касе аз ҷаҳони сиёсат углуи ман нест. Алъон садо мезанам, ки улгуи ман, идеоли ман ҳамон марди бесаводи рустоист, ки руи китф кулвори сахту сангини замонро сабурона мебардорад. Улгуи ман ҳамон бонуи хонабон аст, ки умрбод дар пои панҷара ба танҳоӣ менишинад ва ҷавонияшро пеши мақдами ҳиҷрат ба қурбонӣ месупорад.
