Стокҳолм, 30 январ – Салван Момика, фаъоли ироқии муқими Шветсия, ки бо аксияҳои таҳрикомези сӯзондани Қуръон маъруф шуда буд, шаби 29 январ дар манзили худ дар шаҳри Седертелье тирборон гардид.
Мувофиқи маълумоти Шветсия радио, Момика ҳангоми куштор дар TikTok мустақиман пахши зинда дошт, ва ҳоло дар интернет наворе паҳн шудааст, ки лаҳзаи ҳамла ба ӯро нишон медиҳад.
Момика пеш аз эълони ҳукм кушта шуд
Субҳи 30 январ суди Шветсия мебоист нисбати Салван Момика ҳукм барорад. Парвандаи ӯ бо иттиҳоми «ангехтани адоват» пас аз он боз шуд, ки соли 2023 ӯ чандин маротиба Қуръонро сӯзонд ва ин амали ӯ боиси эътирозҳои байналмилалӣ гардид.
Яке аз аксияҳои ӯ дар назди масҷид дар Стокҳолм баргузор шуда, боиси ҳамла ба сафорати Шветсия дар Бағдод гардид.
Боздоштҳои аввалия: кӣ дар паси куштор аст?
Панҷ нафар бо гумони даст доштан дар куштори Момика боздошт шудаанд. Тафтишоти муқаддамотӣ идома дорад. Ҳанӯз маълум нест, ки ҳамла бо мақсади интиқом анҷом дода шудааст ё ангезаҳои дигар дорад.
Момика ва эҳтимоли дахолати Русия
The New York Times қаблан навишта буд, ки эҳтимолан Русия дар ташкили аксияҳои Момика даст доштааст. Ин нашрия гуфта буд, ки маскав мехост Шветсияро дар саҳнаи ҷаҳонӣ бадном кунад, махсусан дар пасманзари раванди пайвастани ин кишвар ба НАТО.
Ҳоло мақомоти Шветсия мегӯянд, ки тафтишот идома дорад ва маълумоти бештар дар рӯзҳои наздик эълон хоҳад шуд.
