Кормандони милитсия дар вилояти Хатлон як шахси худро “мушкилкушои сеҳрӣ” муаррификарда, ки шаҳрвандонро бо ваъдаҳои пучу хурофотӣ фиреб медод, боздошт карданд.
Чӣ гуна “ҷодугар”-и 67-сола мардумро фиреб медод?
Шаҳрванд Иброҳимов Раҳим, сокини ноҳияи Кушониён, бо баҳонаи ҳалли мушкилоти мардум ва афзоиши даромади онҳо, як шеваи нави фиребгариро истифода мебурд. Ӯ олоти гурги модинаро ба мизоҷонаш ҳамчун “таъминоти молиявӣ” ва калиди “бурдборӣ дар тиҷорат” мефурӯхт.
Барои ин “маводи сеҳрӣ”, ӯ аз мизоҷон 700 то 1000 сомонӣ талаб мекард, ва бовар кунонда буд, ки ҳар кас, ки ин “олоти хос”-ро бо худ нигоҳ дорад, кораш пеш меравад ва дар зиндагӣ муваффақ мешавад.
Фиреби давомдор ва боздошти такрорӣ
Милитсия мегӯяд, ки Иброҳимов Раҳим қаблан низ барои амалҳои хурофотӣ боздошт шуда буд ва ҳатто барои ин ҷурм ҷарима шудааст. Бо вуҷуди ин, ӯ боз ҳам фаъолиятҳои ғайриқонунии худро идома дода, дар байни мардум таассубро паҳн мекард.
Зимни амалиёти санҷишӣ, кормандони ВКД ӯро ҳангоми анҷом додани “маросими сеҳрӣ” дастгир намуданд.
Қонуни Тоҷикистон ва ҷазои ҷодугарӣ
Айни ҳол, нисбати ӯ бо моддаи 240 иловаи 1 Кодекси ҷиноятии Тоҷикистон парвандаи ҷиноятӣ оғоз гардидааст. Тафтишот идома дорад.
Мақомот таъкид мекунанд, ки ҳар гуна фаъолияти хурофотӣ, фиреб ва сӯиистифода аз эътиқоди мардум ҷиноят ҳисобида мешавад.
Ин ҳодиса бори дигар нишон медиҳад, ки мардум бояд ба чунин афроди фиребгар бовар накунанд ва дар ҳолати рӯбарӯ шудан бо ҷодугарон ва қаллобон, ба мақомот хабар диҳанд.
