Дар севумин рӯз пас аз ҷон бохтани Маҳисо Аминӣ таҷаммӯъоти эътирозии густурда дар бисёре аз шаҳрҳои Эрон ҳамчунон баргузор шуд. Бино ба гузориши расонаҳои маҳаллӣ дасти кам ду нафар дар ҷараёни эътирозот дар шаҳри Девондара кушта ва даҳҳо тани дигар захмӣ шудаанд.
Маҳисо (Жино) Аминӣ духтари ҷавони 22 солаи сокини шаҳри Сақиз, ки барои дидор бо хешон ба Теҳрон омада буд, ҳафтаи гузашта аз сӯи пулиси иршод боздошт шуд ва саранҷом низ дар кома ҷон сипурд. Хонаводаи Маҳисо ва аз қарори маълум бисёре аз шаҳрвандони Эрон, ривояти расмии ҳукумат аз марги ӯро намепазиранд.
Гузоришҳои расида аз дохили Эрон дар рӯзи душанбе 19 сентябр ҳокӣ аз он буд, ки таҷаммӯъоти эътирозии донишҷӯӣ дар бисёре аз шаҳрҳои устонҳои Курдистон ва Озарбойҷони ғарбӣ, ҳамчунин дар шаҳрҳои Теҳрон, Исфаҳон, Рашт ва Машҳад баргузор шуд. Бисёре аз шаҳрҳои Курдистон ва Озарбойҷони ғарбӣ низ ба даъвати аҳзоби мухолифи курд, саҳнаи эътисоби умумӣ буд.
Дар охирин вокунишҳо ба ин ҳодиса Жозеп Боррел, масъули сиёсати хориҷии Иттиҳодияи Аврупо дар баёнияи марги Маҳисо Аминиро маҳкум кард ва хостори муҷозоти омилони он шуд.
Эътирозоти рӯзи душанбе низ бо дахолати нерӯҳои пулис ва нерӯҳои зидди шуриши ҳукумати Эрон саркӯб шуд. Нерӯҳои ҳукуматӣ барои мутафарриқ кардани мӯътаризон умдатан аз гулӯлаҳои сочмаӣ, гази ашковар ё мошинҳои обпош истифода карданд.
Ҳамзамон бо баргузории ин эътирозот ва ташдиди даргирӣ миёни нерӯҳои амниятӣ ва мардуми мӯътариз, НетБлокс (NetBlocks) низ аз қатъи интернет дар бархе шаҳрҳои Эрон аз ҷумла Санандеҷ хабар дод.
Омори талафоти ин даргириҳо ҳанӯз равшан нест. Созмонҳои ҳуқуқибашарӣ дар канори эъломи номи бархе аз боздоштиҳои эътирозоти ахир, аз кушта шудани дасти кам ду нафар ва захмӣ шудани дасти кам 13 нафар то бомдоди рӯзи душанбе хабар дода буданд.
Маҳисо (Жино) Аминӣ асри рӯзи сешанбе 13 сентябр аз сӯи пулиси иршоди Теҳрон боздошт ва ба пулиси амниятии Теҳрон мунтақил шуд. Тасовири дурбин нишон дод, ки вай пас аз гуфтугӯ бо яке аз нерӯҳои ҳозир дар салони боздоштгоҳ рӯй замин меафтад. Вай пас аз се рӯзи бистарӣ будан дар бемористони Касрии Теҳрон рӯзи ҷумъа 16 сентябр ҷон бохт. Пайкару ӯ дар зодгоҳаш Сақиз бо ҳузури шумори зиёде аз мардуми мӯътариз ва хашмгин ба хок сипурда шуд. Бемористони Каср иллати марги Маҳисо Аминиро сактаи қалбӣ ва мағзӣ эълом кард.
Дар идома, охирин ахбор дар бораи ҳодисаи марги Маҳисо Аминӣ ва рӯйдодҳои пас аз он то поёни рӯзи душанбе ироа мешавад.
19.09.2022 23:03
Иттиҳодияи Аврупо марги Маҳсо Аминиро маҳкум кард
Жозеп Боррел, раиси дастгоҳи дипломосии Иттиҳодияи Аврупо рӯзи душанбе марги Маҳисо Аминиро маҳкум кард ва онро воқеаи “ғайри қобили қабул” донист. Ў аз мақомоти Эрон хост то омилони ин ҳодисаро муҷозот кунанд.
Питер Стано, сухангӯи Боррел дар баёнияе дар ин робита эълом кард: “ҳафтаи гузашта, Маҳисо Аминии 22 сола пас аз боздошт ба далели нақзи қавонини ҳиҷоб дар Эрон, бар асари ҷарроҳоти ворида дар боздоштгоҳи пулис ҷони худро аз даст дод. Ин марг ғайри қобили қабул аст ва масъулини он бояд посухгӯ бошанд.”
Вай ҳамчунин афзуд: “зарурӣ аст, ки мақомоти Эрон итминон ҳосил кунанд, ки ҳуқуқи асосии шаҳрвандонашон риоят мешавад ва касоне, ки дар маърази ҳар навъ боздошт ҳастанд, таҳти ҳеҷ гуна бадрафторӣ қарор намегиранд.”
19.09.2022 22:31
Гузориши шоҳидони айнӣ аз вуқӯъи даргириҳо дар Теҳрон ҳикоят дорад
Ба гуфтаи онҳо дар бархе минтақаҳои Теҳрон бо мошинҳои обпош ба мардуми мӯътариз ҳамла шуда ва ҳатто гулӯлаҳои сочмаӣ шиллик шудааст.
Мӯътаризон дар ниҳоят бо ҳузури нерӯҳои зидди шуриш ва партоби гази ашковар пароканда шудаанд.
19.09.2022 22:10
Доманаи эътироз ба ҷон бохтани Маҳисо Амини ба Машҳад кашида шуд
Тасовир ва видеоҳои мунташиршуда дар шабакаҳои иҷтимоӣ нишонгари он аст, ки садҳо нафар дар шаҳри Машҳад ва дар эътироз ба ҷон бохтани Маҳисо Аминӣ дар боздоштгоҳи иршод, шомгоҳи душанбе ба хиёбонҳои марказии ин шаҳр омадаанд.
Тазоҳуроти Машҳад, дар пайи эътисоби густурда дар шаҳрҳои Курдистон, Озарбойҷони ғарбӣ, Теҳрон, Рашт ва Исфаҳон рӯй медиҳад.
19.09.2022 22:05
Қатъӣ комили интернет дар Санандиҷ
НетБлокс бо интишори баёнияе эълом кард дастрасӣ ба интернет дар шаҳри Санандиҷ, маркази устони Курдистони Эрон комилан қатъ шудааст.
19.09.2022 20:24
Як духтарбачаи 10 сола дар ҷараёни тазоҳуроти букон бо шиллики гулӯла ба сараш маҷрӯҳ шудааст
Созмонҳои ҳуқуқибашарӣ, бо интишори видеое гузориш кард як духтарбачаи 10 сола дар пай исобати гулӯла ба сараш ба шиддат маҷрӯҳ ва ба бемористон мунтақил шудааст.
19.09.2022 19:16
Тасовири мунташиршуда дар шабакаҳои иҷтимоӣ нишон медиҳад, ки нерӯҳои амниятӣ аз мошини обпош барои парокандани мӯътаризон истифода мекунад.
19.09.2022 19:02
Коҳиши шадиди суръати интернет дар маркази Теҳрон
Як шоҳиди айнӣ аз майдони инқилоби Теҳрон ба Евро-Нюз гуфтааст суръати интернет дар маркази шаҳр ба шиддат поин омадааст. Ба назар мерасад мақомҳои амниятии Эрон талош мекунанд бо иҷрои проекти мавсум ба “сиёнат” (ҳимоя), бидуни қатъи саросарии интернет, интишори ахбор ва тасовир аз сӯи шаҳрвандонро душвор кунанд.
19.09.2022 18:25
Эътирозоти Теҳрон ба майдони Вали-Аъср расид. Як шоҳиди айнӣ аз майдони инқилоб ба Евро-Нюз гуфтааст ҷуи ин минтақа бисёр муташанниҷ аст.
19.09.2022 18:06
Тозатарин видеоҳо аз Эрон нишон медиҳанд, ки мӯътаризон ба марги Маҳисо Аминӣ дар маркази Теҳрон шиорҳои зидди ҳукумтӣ медиҳанд.
Шоҳиди ҳодисаи муҳим шудед?
Иттилоъ, акс ё видео фиристед — маводҳо махфона баррасӣ мешаванд.
