Раиси Додгоҳи Олии Тоҷикистон Шермуҳаммади Шоҳиён дар нишасти матбуотиаш изҳор кард, ки шахсан надидааст, ки ҳуқуқи ягон кас дар кишвар нақз шуда бошад.
Шоҳиён на танҳо ба волоияти ҳуқуқи инсон дар кишвар бовар дорад, балки мутмаъин аст, ки ҳеҷ парванда ва маҳбусе дар Тоҷикистон сиёсӣ нест. Ӯ на танҳо парванда ва ҳабси Зайд Саидов ва Бузургмеҳр Ёров, ҳатто парвандаи ҲНИТ-ро ҳам сиёсӣ намедонад.
Раиси Додгоҳи Олӣ дар мавриди парвандаи Зайду Бузургмеҳр гуфт: “Тамоми меъёру муқаррароти санадҳои байналмиллалӣ дар доираи Конститутсия ва қонунгузории Тоҷикистон риоя шудаанд ва аз ҷониби коршиносони байналмиллалӣ ҳам баҳои хеле баланд дода шудаанд.”
Шоҳиён гуфт Зайд Саидов ва Бузургмеҳр Ёров на ба хотири ташкили ҳизб ва дифоъ аз маҳбусони ҲНИТ, балки баро қаллобӣ ва дигар ҷиноятҳо боздошт ва зиндонӣ шудаанд.
Изҳороти созмонҳои байналмиллалиро дар мавриди нақзи ҳуқуқи башар дар Тоҷикистон, Шоҳиён “кори онҳо” номид ва гуфт, ки “шахсан надидаам, ки аз ҷониби мақомоти додгоҳӣ ҳуқуқи касе нақз шуда бошад”.
Раиси Додгоҳи Олӣ дар ҳоле аз ҷой надоштани нақзи ҳуқуқи инсон дар Тоҷикистон ҳарф мезанад, ки созмонҳои байналмиллалӣ аз торафт бадтар шудани он бонги хатар мезананд.
Ҳамчунин тибқи маълумотҳои расида, маҳбусини сиёсӣ, аз ҷумла аъзои ҲНИТ дар рӯзҳои охир бо шиддат шиканҷа мешаванд. Хосият Ёрова, хоҳари Бузургмеҳр Ёров ҳам дирӯз дар саҳифаи фейсбукиаш навишт, сар аз 31 декабри соли гузашта ҳеҷ иттилое аз бародараш надорад ва ҳатто вақте хӯроки бурдаашро қабул мекунанд, посухашро аз Бузургмеҳр намеоранд.
