Дар шаҳри Хуҷанд ва ноҳияи Бобоҷон Ғафуров Кумитаи давлатии амнияти миллӣ “шикор”-и собиқ аъзои Ҳизби наҳзати исломии Тоҷикистон ва тарафдорони онро ба роҳ мондааст.
Тибқи иттилои манбаъи Паём.нет давоми ҳафтаи охир ҳади ақал 25 аъзо ё тарафдори собиқи ҳизб аз тарафи КДАМ боздошт шудаанд. Бархе аз онҳо беш аз як шабонарӯз нигаҳдорӣ ва шадидан латукӯб шудаанд.
Аксари онҳо танҳо баъди пардохти маблағи ҳангуфт озод шудаанд. “Айб”-е ки кормандони шӯъбаи КДАМ дар вилояти Суғд ба бахшҳои он дар шаҳри Хуҷанду ноҳияи Бобоҷон Ғафуров ба онҳо гузоштаанд, узвияти қаблиашон дар ҲНИТ ё ширкат дар маъракаҳои он будааст.
Баъзе аз боздоштшудагоне, ки наздиконашон дар Русия қарор доштаанд, ба ин муттаҳам шудаанд, ки гӯё он наздиконашон дар тазоҳуроти Варшава ширкат кардаанд. Дар ҳоле, ки ҳеҷ далеле пешниҳод нашудааст. ин иттиҳом ба онҳо бор карда шуда, маблағҳои ҳангуфте рӯёнида шудааст.
Қаблан мақомоти кишвар эълон карда буданд, ки баъди баста шудани ҲНИТ ҳар касе дар фаъолияти он ширкат накард, гунаҳкор ҳисобида намешавад. Аммо мисли ҳамеша ба ин ваъдаашон ҳам хиёнат карда, ба “шикор”-и наҳзатиҳои собиқ оғоз кардаанд. То ҳол маълум нест ин кор бо амори ҳукумати кишвар сурат мегирад, ё КДАМ роҳи навбатии пулкоркуниро кашф кардааст.
