Дар соли 2024 дар додгоҳҳои Русия шумораи муроҷиатҳо барои эътирофи шахсон ҳамчун бедаракшуда ё фавтида ба 20 040 парванда расид, ки ин рақам дар муқоиса бо солҳои қаблӣ 2,5 баробар зиёд аст. Дар ин бора нашрияи “Медиазона” гузориш додааст.

Нақши фармондеҳони низомӣ дар ин раванд

Ба навиштаи “Медиазона“, қисми зиёди ин муроҷиатҳоро фармондеҳони қисмҳои ҳарбӣ фиристодаанд. Мақсади онҳо поксозии феҳристи ҳайати шахсӣ аз онҳое, ки дар ҷанг кушта шудаанд, вале марги онҳо расман сабт нашудааст, мебошад.

Чаро чунин ҳолат бори аввал ба қайд гирифта шуд?

Аз нимсолаи дуюми соли 2024 қисмҳои ҳарбӣ оммавӣ ба додгоҳҳо ариза пешниҳод карданд, то сарбозоне, ки бе ному нишон шуда ё дар муҳориба фавтида, вале расман сабт нашудаанд, аз феҳрист хориҷ шаванд.

Ин аввалин мавҷи бузурги мурофиаҳо пас аз оғози ҷанг мебошад ва барои бори аввал нишонаҳои возеҳи оммавии бедаракшавии низомиён ошкор гардиданд.

Дар соли 2023 вазъият тақрибан ба давраи сулҳ монанд буд – он сол 8 ҳазор чунин парванда сабт шуда буд.

Кадом додгоҳ бештар чунин аризаҳоро гирифтааст?

Дар Октябрский суди вилояти Ростов соли 2024 1 243 парванда барои эълони шахсон ҳамчун бедаракшуда ё фавтида сабт шудааст.

Анна Велищенко, ёвари раиси суд, ба “Медиазона” тасдиқ кардааст, ки аксари муроҷиаткунандагон низомиён ҳастанд ва ҳолатҳои муроҷиати хешовандон хеле кам ба назар мерасанд.

Мушкилоти дақиқ кардани шумораи низомиёни бедаракшуда

Журналистони “Медиазона” мегӯянд, шумораи аслии низомиёни бедаракшуда ё фавтида-ро ҳисоб кардан мушкил аст, зеро:

• Додгоҳҳо маълумоти дақиқро пинҳон медоранд
• Аризаҳо бе зикри ном ва тафсилот баррасӣ мешаванд
• Ҳукмҳои судӣ барои ҷомеа дастрас нестанд

Бо назардошти афзоиши чунин мурофиаҳо ва махфӣ нигоҳ доштани маълумот, тақдири ҳазорҳо низомӣ номаълум боқӣ мемонад.