Дар рӯзи 7-уми январи соли 2025, яке аз хатарноктарин заъфиятҳои амниятӣ дар браузерҳои маъруф, ба монанди Google Chrome ва Mozilla Firefox, бо рамзи CVE-2025-0291 ошкор гардид. Ин заъфият ба сабаби иштибоҳи “Type Confusion” дар муҳаррики JavaScript V8, ки дар Google Chrome истифода мешавад, ба вуҷуд омадааст. Ин хатогӣ ба ҳакерҳо имкон медиҳад, ки бо истифода аз саҳифаҳои махсуси HTML, барномаҳои зарароварро ба таври дурдаст иҷро намуда, дастрасии пурра ба дастгоҳҳои истифодабарандагонро ба даст оранд.

Хатари заъфият дар чист?

Агар ҳакерон ин заъфиятро истифода баранд, онҳо метавонанд:

Маълумоти шахсиро, аз қабили паролҳо ва маълумоти молиявӣ дузданд.

Барномаҳои ҷосусӣ ё вирусҳоро насб кунанд.

Дастгоҳи шуморо пурра назорат кунанд, аз ҷумла ба камера ва микрофон дастрасӣ пайдо кунанд.

Кадом дастгоҳҳо дар хатар қарор доранд?

Ҳама истифодабарандагони браузерҳои Google Chrome ва Mozilla Firefox дар платформаҳои Windows, macOS, Linux, Android ва iOS метавонанд мавриди ҳамла қарор гиранд.

Чӣ гуна муҳофизат кунем?

1. Браузери худро фавран навсозӣ кунед:

Барои Google Chrome: версияи 131.0.6778.264 ё навтарро насб кунед.

Барои Mozilla Firefox: то версияи 134 навсозӣ кунед.

2. Системаи амалиётиро навсозӣ кунед: Ҳатман версияҳои охирини Windows ва Android-ро насб намоед.

3. Аз сайтҳои номаълуми интернет дурӣ ҷӯед: Линкҳо ё саҳифаҳои шубҳанокро накушоед.

4. Антивирус истифода баред: Барномаҳои амниятӣ метавонанд ҳамлаҳоро пешгирӣ кунанд.

Чаро ин масъала муҳим аст?

Мутахассисон хабар медиҳанд, ки заъфияти CVE-2025-0291 аз ҷониби ҳакерҳо фаъолона истифода мешавад. Агар дастгоҳҳо сари вақт навсозӣ нашаванд, истифодабарандагон ба хатари ҷиддӣ рӯ ба рӯ мешаванд.

Барои ҳифзи худ, ҳамеша браузер ва системаҳои амниятии худро сари вақт навсозӣ кунед. Муҳофизати иттилоот ва маълумоти шахсӣ — вазифаи муҳимми ҳар як истифодабаранда мебошад.