Бо гузашти беш аз ду моҳ аз ҳодисаҳои хунини Конибодом, мақомоти Тоҷикистон ҳанӯз натавонистаанд амният ва оромии комилро дар шаҳр барқарор кунанд.

Изҳороти раиси нави шаҳр

Имрӯз, 4-уми феврал, Даврон Зоҳидзод, раиси тозатаъини шаҳри Конибодом, дар нишасти матбуотӣ вазъи кунуниро шарҳ дод. Ба гуфтаи ӯ, гарчанде вазъ кӯмаке беҳтар шудааст, аммо сокинон то ҳол шабона навбатдорӣ мекунанд, то амнияти маҳалли зисти худро таъмин намоянд.

Ӯ таъкид кард, ки ҳанӯз ҳам бархе аз сокинон, ки аз тарс шаҳрро тарк кардаанд, ба хонаҳои худ барнагаштаанд. Ҳукумати шаҳр дар талош аст, ки бо кафолати амниятии лозим онҳоро дубора ба манзилҳояшон бозгардонад.

Ҷараёни таҳқиқ ва боздоштҳо

Ба гуфтаи Зоҳидзод, чор нафаре, ки бо гумони даст доштан дар кушторҳои силсилавӣ боздошт шудаанд, талош доранд бо ироаи маълумоти бардурӯғ тафтишотро гумроҳ кунанд.

Аммо ӯ таъкид намуд, ки мақомот бо ҷиддият ба таҳқиқи ин қазия машғуланд ва кӯшиш доранд ҳама омилони ҷиноятро ошкор ва боздошт кунанд.

Тафсилоти кушторҳо

Дар давоми соли 2024, даҳҳо нафар, аз ҷумла занону кӯдакон, аз сӯи афроди ношинос дар манзилҳои худ ба таври ваҳшиёна кушта шуданд.

Ин ҳодисаҳои хунин сабаби тарси шадиди сокинон гардида, бархе хонаҳои худро тарк намудаанд.

Суолҳои беҷавоб

Бо вуҷуди иддаоҳои мақомот дар бораи муваффақиятҳои амниятӣ, боздошти ҳарҳафтаинаи террористон, таҳқиқи кушторҳои Конибодом ҳанӯз натиҷаи аниқ надорад.

Бархе сокинон мепурсанд:

• Чаро то ҳол омилони асосии ин кушторҳо боздошт нашудаанд?
• Чаро мақомоти амниятӣ, ки даъво мекунанд, ҳар ҳафта террористонро безарар мекунанд, натавонистанд ин ҷиноятро комилан ошкор созанд?
• Оё сокинон метавонанд ба тафтишоти расмӣ эътимод кунанд?

Ҳоло мардуми Конибодом дар интизори посухи мушаххас ва барқарор шудани амнияти комил дар шаҳр ҳастанд. TajNews таҳаввулоти ин қазияро пайгирӣ хоҳад кард.