Дар остонаи соли нав таҳлилгарони мо мушкилоти асосии кишварро, ки дар тӯли соли 2024 диққати ҷомеаро ба худ ҷалб карданд, таҳлил намуданд. Ин масъалаҳо на танҳо ба зиндагии ҳаррӯзаи шаҳрвандон таъсир расониданд, балки барои рушди ояндаи кишвар низ монеа эҷод карданд.

1. Буҳрони энергетикӣ

Маҳдудияти интиқоли барқ ё “лимит” дар фасли зимистон ба мушкилоти доимии сокинони Тоҷикистон табдил ёфтааст. Тибқи иттилои манбаъҳои расмӣ, аз 22-юми сентябри соли 2024 маҳдудият ҷорӣ гардид. Ширкати “Барқи тоҷик” сабаби асосиро камбуди об ва афзоиши талаботи аҳолӣ ба барқ медонад. Мувофиқи изҳороти Президенти кишвар Эмомалӣ Раҳмон, ин мушкилӣ то соли 2027 пурра бартараф хоҳад шуд.

2. Мушкилоти интернет

Сифати пасти интернет ва нархи баланди он яке аз масъалаҳои ҳалталаб боқӣ мемонад. Новобаста аз дастуру супоришҳои роҳбарияти олии кишвар ва ҷаримабандии ширкатҳои провайдерӣ аз ҷониби Хадамоти алоқа, вазъият беҳбудии назаррас наёфтааст.

3. Масъалаи сарбозгирӣ

Ҷалби ғайриқонунии ҷавонон ба хизмати ҳарбӣ ё “облава” яке аз масъалаҳои ҳассос боқӣ мемонад. Бо вуҷуди пешниҳоди имтиёзҳои гуногун аз ҷониби давлат, ҳолатҳои вайронкунии ҳуқуқи ҷавонон ҳангоми даъват ба артиш ҳанӯз ҳам ба қайд гирифта мешаванд.

4. Буҳрони соҳаи маориф

Мушкилоти асосӣ дар ин самт норасоии омӯзгорон, ҳолати ташвишовари биноҳои таълимӣ ва норасоии китобҳои дарсӣ мебошад. Тибқи маълумоти расмӣ, барои ҳалли ин масъалаҳо ба вазорати маориф муҳлати дусола дода шудааст.

5. Муҳоҷирати меҳнатӣ

Соли 2024 барои муҳоҷирони меҳнатии тоҷик дар Русия соли душвор буд. Пас аз ҳодисаи террористӣ дар “Крокус Сити Холл”, муҳоҷирон бо маҳдудиятҳои нав рӯ ба рӯ шуданд. Дар аксари минтақаҳои Русия фаъолияти муҳоҷирон дар бисёр соҳаҳо маҳдуд карда шуд.

6. Фасод

Мубориза бо фасод яке аз самтҳои афзалиятноки сиёсати давлатӣ боқӣ мемонад. Тибқи маълумоти Оҷонсии зиддифасод, дар соли 2024 бештарин ҳолатҳои фасод дар мақомоти иҷроияи маҳаллӣ (240 ҳолат) ва соҳаи маориф (181 ҳолат) ба қайд гирифта шудаанд.

7. Ҳуқуқи инсон

Масъалаи риояи ҳуқуқи инсон дар кишвар мавриди таваҷҷуҳи созмонҳои байналмилалӣ қарор дорад. Тағйироти нав дар қонуни танзими анъана ва ҷашну маросим, ки либоспӯширо маҳдуд мекунад, боиси баҳсҳои зиёд гардид.

Таҳлилгарони TajNews қайд мекунанд, ки ҳалли ин мушкилот на танҳо ба беҳбудии сатҳи зиндагии мардум, балки ба рушди устувори кишвар таъсири мустақим мерасонад. Барои ҳалли ин масъалаҳо иродаи сиёсӣ ва саъю талоши муштараки ҷомеа ва давлат зарур аст.

Таҳияи TajNews