Бино бар гуфтаи як манбаъи «Паём.нет» субҳи имрӯз суди косатсионӣ дар бораи ҳукми адвокати маъруф Б. Ёров кори худро ба анҷом расонда, эълон кардааст, ки ин ҳукм бетағйир боқӣ мемоад.
Ин дар ҳолест, ки Б. Ёров ба 23 соли зиндон маҳкум шудааст. Дар ибтидо Бузургмеҳр Ёров танҳо ба хотири қаллобӣ боздошт шуд ва парвандааш бар ҳамин асос ба додгоҳ рафт. Аммо пас аз онки мақомот натавонистанд ӯро аз азмаш барои ҳимояи боздоштшудагони ҲНИТ мунсариф кунанд, якбора парвандаҳои нав нисбати ӯ пайдо шуданд ва ӯро ба табаддулоти давлативу ифротгароӣ ҳам муттаҳам карданд.
Аммо бузургмеҳр касе набуд, ки аз ин таҳдидҳо битарсад ва ба осонӣ таслими онҳо шавад. Ӯ қонунро аз судяву муфаттишҳо дида беҳтар медонад. Ҳамеша суханрониҳояш дар додгоҳ тамоми барномаҳои аз пеш рехтаи мақомотро вайрон мекард. Бинобарин мақомот ба хотири пинҳон доштани шикасташон дар муқобили Бузургмеҳр дастур доданд, ки парвандаи ӯ ҳам пушти дарҳои баста баррасӣ шавад. Ҳатто дар муҳокимаҳояш бо баҳонаҳои дуруӯғин намояндагони расонаҳо ва ҷомеаи шаҳрвандиро роҳ намедоданд. Борҳо муҳокимаро ба таъхир андохтанд.
Ҳатто чандин вакилони дифоъ ба таври мармуз аз ҳимояи ӯ дасткашиданд. Бародараш Ҷамшед Ёров ҳам пас боздошти чанд ҳафтагӣ маҷбур шуд тарки Тоҷикистон кунад. Ҳатто яке аз вакилони дифоъаш ҳам ахиран маҷбур шуд тарки Тоҷикистон кунад.
Ин дар ҳолест, ки имрӯз баъд аз зуҳр қарор аст дар суди ноҳияи Фирдавсӣ муҳокимаи ӯ аз руи моддаи 247 баргузор гардад. Маълум нест, ки аз руи ин модда боз чанд соли дигар ба ҳукми ӯ изофа карда мешавад.
