Дар Тоҷикистон фурӯши симкортҳои телефонҳои мобилӣ аз ҷониби Сиёвуш ва Рамз Зуҳуровҳо, пайвандони Бег Сабурӣ, сардори Хадамоти алоқаи Тоҷикистон монополия шудааст.
Мақомоти Тоҷикистон фаъолияти марказҳои диллерие, ки ба фурӯши симкортҳои телефонҳои мобилӣ машғул буданд, манъ намуда дари онҳоро ба рӯи муштариёнаш бастааст. Бино ба маълумотҳои расонаишуда минбаъд ба ғайр аз ду ширкат «Ошно-групп» ва «О мобайл» дигар ширкатҳо ҳаққи фурӯши симкортҳоро надоранд.
Тибқи феҳрасти Кумитаи андози Тоҷикистон, ширкати «Ошно-групп» моҳи декабри соли 2015, ба шаҳрвандони Тоҷикистон Сиёвуш ва Рамз Зуҳуровҳо тааллуқ дорад. Аммо дар бораи муассис ва роҳбарияти ширкати «О мобайл» ҳеҷ маълумоте дастрас нашудааст.
Масъулини Хадамоти алоқаи Тоҷикистон ба расонаҳо гуфтаанд, ин танҳо барои ба танзим даровардани фаъолияти ширкатҳои мобилӣ ва чораи амниятӣ буда, ҳар ширкате, ки иҷозатнома дорад, метавонад тиҷорати фурӯши симкортҳои телефонҳои мобилиро ба роҳ монад. Барои он ширкатҳое, ки иҷозатнома доранд, мамониате вуҷуд надорад.
Аммо ҳамчунон, ки маълум шудааст, ширкатҳое, ки то ба ҳол ин иҷозатномаро ба даст овардаанд, яке гумном ва дигаре марбути хонадони сардори Хадамоти алоқаи Тоҷикистон Бег Сабурӣ мебошад ва баъид нест, ки ширкати дувумӣ низ марбути ҳамин хонадон аст. Дар ин ҳолат муҳол аст дигар ширкатҳо ҷасорати ба даст овардани иҷозатномаро карда худро рақиб ё конкуренти тиҷорати вазири алоқа намоянду сарашонро дар бало гузоранд.
Сиёвуш Зуҳуров
Сиёвуш Зуҳуров, роҳбари ширкати «Ошно-групп» писари дуввуми Бег Сабурӣ (Зуҳуров) буда таҳсилдидаи факултаи ҳуқуқшиносии Донишгоҳи миллии Тоҷикистон, шавҳари Зарина Раҳмонова, духтари президенти Тоҷикистон Эмомалӣ Раҳмон мебошад. Ҳамчун муштзан дар чандин мусобиқаҳои варзишии байналмилалӣ иштирок кардааст.
Бег Сабурӣ
Бег Сабурӣ (Зуҳуров) соли 2004 муовини вазири алоқаи Тоҷикистон ва пас аз ду сол муовини аввали вазир таъин шуда буд.
Баъдан ба ҳайси муовини вазири нақлиёт ва коммуникатсияи Тоҷикистон кор карда, бахши алоқаи кишварро зери назорат дошт.
Аммо дар пайи тақсим шудани Вазорати нақлиёт ва коммуникатсия ба ду идораи мустақил Бег Сабурӣ сардори Хадамоти алоқаи Тоҷикистон таъин гардид.
Ҳамзамон раиси Шӯрои директорони Ҷамъияти саҳомии кушодаи «Тоҷиктелеком» мебошад.
