Хоҳари Шарофиддин Гадоев, фаоли сиёсии тоҷикро бо баҳонаи доштани камбудӣ дар ҳуҷҷатҳояш барои парвоз ба хориҷ аз фурудгоҳи шаҳри Кулоб роҳ надоданд.
Шарофиддин Гадоев ҳини тамос ба мо гуфт, хоҳараш Ҳафизамоҳ Гадоева ба ҳамроҳи 4 фарзандаш мебоист субҳи 8 март бо хатсайри Кулоб — Маскав павроз кунад, аммо бо баҳонаи камбудӣ дар ҳуҷҷатҳои тасдиқкунандаи шахсияташ уро аз парвоз маҳрум кардаанд.
Шарофиддин Гадоев , аз шарикони соҳибкори тоҷик Умаралӣ Қувватов буд, ки дар соли 2012 ҳарду тарки Тоҷикистон карда, «Гурӯҳи 24” – як созмони мухолифи ҳукумати кунуниро таъсис доданд. Мақомоти Тоҷикистон ба дунбол ҳардуро ба аз худ кардани 6 миллион сомонӣ пули ширкати «Фароз”, ки ҳоло ба Шамсулло Соҳибов, яке аз домодҳои раисиҷумҳур Эмомалӣ Раҳмон тааллуқ дорад, айбдор карданд ва дар соли 2014 «Гурӯҳи 24”-ро ба рӯйхати созмонҳои мамнӯъ ворид карданд.
Умаралӣ Қувватов соли 2015 дар натиҷаи як сӯиқасди мусаллаҳона дар шаҳри Истамбули Туркия кушта шуд. Шарофиддин Гадоев ҳоло дар яке аз кишварҳои Аврупо ҳамчун паноҳандаи сиёсӣ ба сар мебарад.
