Рӯзи душанбе, 9-уми ноябр, як шаҳрванд дар саҳифаи фейсбукии худ аз сатҳи хидматрасонии “Душанбе Сити Бонк” шикоят кард.
Дар навори видеоӣ ӯ мегӯяд, ки барои ҳалли як мушкили хурд дар як моҳ ду маротиба ба бонк муроҷиат кардааст, аммо ҳар дафъа маҷбур шудааст аз ду то се соат дар навбат интизор шавад.
Ин муштарии бонк суол мегузорад, ки чаро чунин масъалаҳоро тавассути хидматрасониҳои онлайнӣ ҳал кардан имкон надорад? Ба гуфтаи ӯ, вақте ба бонк паём мефиристад, ба ӯ тавсия медиҳанд, ки ба идора муроҷиат кунад. Дар натиҷа, барои ҳалли як масъалаи хурд муштариён маҷбур мешаванд соатҳои зиёд интизор шаванд.
Ин аввалин ҳолат нест, ки муштариён аз сифати хидматрасонии “Душанбе Сити Бонк” шикоят мекунанд. Қаблан низ сокинон аз тарзи хидматрасонии ин муассисаи молиявӣ норозигӣ баён карда буданд, аммо то ҳол, ба гуфтаи онҳо, ин мушкилот роҳи ҳалли худро пайдо накардааст.
Қаблан “Душанбе Сити Бонк” ба рӯйхати муассисаҳое ворид шуда буд, ки нисбати онҳо аз ҷониби Иттиҳоди Аврупо таҳрим ҷорӣ гардида буд. Тибқи қарори Шӯрои Иттиҳоди Аврупо, ширкатҳо ва шаҳрвандони кишварҳои узви ИА ҳақ надоштанд бо ин бонкҳо муомилоти молӣ анҷом диҳанд.
Иттиҳоди Аврупо ин муассисаҳои молиявиро ба кумак дар канор задани баъзе маҳдудиятҳои содиротӣ ва мусоидат ба интиқоли баъзе молу технологияҳое, ки метавонанд дар бахши низомии Русия истифода шаванд, муттаҳам карда буд.
Шоҳиди ҳодисаи муҳим шудед?
Иттилоъ, акс ё видео фиристед — маводҳо махфона баррасӣ мешаванд.
