Дар шаҳри Петропавловски Қазоқистон, дар дохили Академияи гвардияи миллии Ҷумҳурии Қазоқистон, миёни курсантҳои соли аввали таҳсил як задухӯрди гурӯҳӣ рух додааст. Дар ин бора рӯзи 11-уми апрел сомонаи Ratel.kz хабар дод.
Ба иттилои пешакӣ, дар муноқиша 41 нафар курсант, аз ҷумла 16 шаҳрванди Тоҷикистон, иштирок доштаанд. Дар натиҷаи задухӯрди гурӯҳӣ, чанд тан аз иштирокчиён осеби ҷисмонӣ дидаанд — асосан харошидагӣ ва гематома. Ба гуфтаи мақомоти расмӣ, ниёз ба бистарӣ кардан ё кумаки таъҷилӣ пеш наомадааст.
Дар Академияи гвардияи миллӣ феълан 44 шаҳрванди Тоҷикистон таҳсил мекунанд, ки ҳамаи онҳо дар доираи ҳамкориҳои кишварҳои узви Созмони Аҳдномаи Амнияти Дастаҷамъӣ (ОДКБ) ба таҳсил фаро гирифта шудаанд. 16 нафари онҳо, ки дар ин ҳодиса ширкат доштаанд, курсантҳои соли аввал мебошанд.
Мақомоти академия хабар додаанд, ки тафтишоти дохилӣ дар робита ба ин ҳодиса оғоз шудааст. Шахсони масъул сабабҳои дақиқи муноқишаро таҳқиқ намуда, дараҷаи ҷавобгарии ҳар як иштирокчиро муайян хоҳанд кард.
Мақомот то ҳол дар бораи сабаби аслии муноқиша ва ангезаҳои эҳтимолии он маълумоти расмӣ пешниҳод накардаанд.
Ин гуна ҳодисаҳо, бахусус бо иштироки донишҷӯёну курсантҳои тоҷик дар хориҷ, пайваста мавриди таваҷҷуҳи ҷомеа ва расонаҳо қарор мегиранд, зеро метавонанд ба муносибатҳои байнидавлатӣ ва имиҷи шаҳрвандон таъсиргузор бошанд.
TajNews мавзӯро пайгирӣ мекунад.
