Адам Кадиров, писари севвуми раҳбари Чеченистон Рамзан Кадиров, зери номи маъруфаш ба ҷомеа шинохта намешавад. Тибқи иттилои расонаҳо, ӯ дар ду шиносномааш номи дигар дорад ва дар ҳуҷҷатҳои расмӣ ҳамчун Моҳмад Рамзанович Кадиров ва Моҳмад Рамзанович Мусаев сабт шудааст.
Таҳқиқоти журналистии «Агентство» бо такя ба маълумоти Хадамоти марзбонии Русия нишон додааст, ки барои сафарҳои хориҷӣ Адам Кадиров аз ду шиноснома истифода мекунад ва ягон шиносномаи расмии давлатӣ бо номи Адам Кадиров ёфт нашудааст.
Ин усули тағйири ному насаб дар доираи хонаводаи Кадиров нав нест. Ба гуфтаи манбаъ, ҳатто амаки Рамзан Кадиров — Магомед Кадиров, дар шиноснома бо номи дигар — Ҳамид — сабт шудааст.
Ин равиш як намунаи пинҳонкорӣ ва истифодаи ҳувиятҳои ивазшуда дар байни наздикони раҳбари Чеченистон мебошад. Тибқи маълумот, на танҳо Адам (Моҳмад), балки писари дигари Кадиров — Эли низ чунин корро кардааст. Ӯ ду шиноснома доштааст: яке бо номи Али Кадиров, дигаре бо номи Али Мусаев.
Ба ҳамин шакл, таҳти насаби Мусаев фарзандони дигари Кадиров — Айшат, Карина, Табарак, Хеди, Аҳмад ва Абдулло — ба хориҷ сафар мекунанд. Ҳатто ҳамсари Кадиров — Медни — шиносномае бо ҳамин насаб дорад.
Ба ёд дорем, ки Адам Кадиров дар соли 2023 баъд аз латукӯби Никита Журавел — ҷавоне, ки ба сӯзонидани Қуръон муттаҳам шуда буд — маъруфият пайдо кард. Баъд аз ин ҳодиса, мақомоти маҳаллӣ ва федералӣ ба ӯ даҳҳо ҷоиза ва унвон доданд. Дар моҳи апрели соли 2024, бо вуҷуди он ки танҳо 17-сола буд, Адам Кадиров куратори Вазорати корҳои дохилии Чеченистон таъин гардид.
Ин хабар саволҳои зиёде дар бораи шаффофияти мақомот ва ҳувияти воқеии наздикони раҳбари Чеченистон ба миён меорад.
