Имрӯз вакили дифоъ Нуриддин Маҳкамов, ки додгоҳаш якҷоя бо Бузургмеҳр Ёров баргузор мегардад, имрӯз сухани охирини худро ироа кардааст.
Маҳкамов гуфтааст, ки “Бузургмеҳр аз номи ман ягон мақола нанавиштааст.
Ҳар мақолае, ки нашр мекардам худам менавиштам ва барои пулҳои ҳалоли худам мубориза мебурдам. Он мақолаҳо чор сол пеш навишта шуда буданд ва чӣ гуна мешудааст, ки он замон хусусияти ифротгароӣ надоштаанду вақте ки Бузургмеҳр Ёров боздошт мешавад, мақолаҳои чор сол пешина якбора хусусити ифротгароӣ пайдо мекардаанд?”
Ёдовар мешавем Нуриддин Маҳкамов барои баргардонидани пулҳояш аз додарарӯси Раисҷумҳур Ҳасан Асадуллозода мубориза мебурд. Ҳасан Асадуллозода ба гуфтаи Маҳкамов 400 000 доллари ӯро бо роҳи қаллобӣ азхуд намуда буд. Баъдан Маҳкамов бо сабаби номаълуме аз навиштан алайҳи Асадуллозода даст кашид ва аз сарвазири собиқи Тоҷикистон Яҳё Азимов 2 миллион доллари худро талаб мекард.
Баъди боздошти Бузургмеҳр Ёров Нуриддин Маҳкамов ҳам боздошт шуд ва мурофиаи онҳо якҷоя баргузор мегардад.
Бузургмеҳр Ёров сухани охирини худро фардо, 21 сентябр соати 10.00 ироа хоҳад кард.
