Дар Қазоқистон никоҳи мусалмониро дар масоҷид бидуни надоштани шаҳодатномаи акди никоҳи давлатӣ, ки дар дафтари идораҳои марбута қайд мешавад, мамнӯъ эълон намуданд.
Габит Алмазбек, муовини аввали Кумитаи дини назди вазорати кор бо дину ҷомеаи шаҳрвандии Қазоқистон гуфтааст, ки ин ниҳод ба тамоми масоҷиди қаламрав дастур додааст, ки аз никоҳи шаҳрвандоне, ки дар даст шаҳодатномаи сабти никоҳи шаҳрвандӣ дар органҳои ҳукуматӣ надоранд, худдорӣ намоянд. Вай таъкид кардааст, ки масҷидҳо пас аз хондани никоҳи навхонадорон гувоҳномае намедиҳад ва ин ҳукми қонунӣ надорад. Шояд дар вақту замоне никоҳи мусалмонӣ ҳукми қонунӣ дошт, аммо ҳоло бидуни шаҳодатномаи никоҳи органҳои ҳукуматӣ хондани никоҳ аз нигоҳи шариати исломӣ бисёрзаниро дар ҷомеа ривоҷ медиҳад, ки қонунҳои кишвар онро иҷозат намедиҳанд.
Омори расмии Қазоқистон ҳокист, ки дар даҳ соли охир никоҳи мусалмонӣ дар байни аҳолии қаламрав нуфузи бештар пайдо кардааст ва дар ин муддат ҳудуди 30 000 нафар навхонадорон дар масоҷид никоҳи худро хонондаанд. Гуфта мешавад, мақомоти Остона аз он нороҳат гаштаанд, ки қисмати бештари шаҳрвандоне, ки аз никоҳи мусалмонӣ гузаштаанд, ҳангоми ҷудоиҳо наметавонанд дар додгоҳҳо аз ҳуқуқи худ дифоъ намоянд ва бештар занон аз ин ҷабр мебинанд. Дар тақсими молу мулк ва ояндаи фарзандони ноболиғ якдигарнофаҳмиҳо ба вуҷуд омада, боиси дилхирагиҳо мегардад.
Гуфта мешавад, дар қонунҳои Қазоқистон никоҳи мусалмонӣ қонунӣ ҳисобида нашудааст ва шаҳрвандон аз он ба ҳайси суннатҳои аҷдодӣ истифода мекунанд.
Дар ҳамин ҳол созмонҳои дифоъ аз ҳуқуқи башар низ дар ин робита садо баланд кардаанд ва гуфтаанд, ки аз суиистифода аз никоҳи мусалмонӣ қисмате аз мардуми доро ба сафи занҳои худ афзудаанд ва ҳатто ҳодисаҳое ҳем кам нестанд, ки духтарони ноболиғро ба никоҳи худ дароварда, қонунҳои ҷориро поймол месозанд.
Дархости никоҳ дар масоҷид бидуни шаҳодатномаи сабти никоҳи шаҳрвандӣ дар органҳои ҳукуматӣ дар таҷрибаи давлатҳои пасошӯравии Осиёи Марказӣ як воқеаи нав нест. Масалан, Узбакистон панҷ сол пеш аз ин муллоҳои никоҳхонро водор сохта буд, ки бидуни шаҳодатномаи никоҳи ҳукуматӣ никоҳи навхонадоронро нахонанд. Дар акси ҳол ба ҷаримаҳои ҳангуфте рӯбарӯ хоҳанд гашт.
