Кумитаи кор бо занон ва оила аз зиёд шудани аъзои нави ташкилоти ибтидоии ҳизбии «Оила» иттилоъ додааст. Вале дар хабаре, ки ин Кумита дар сомонааш нашр кардааст, фаромўш шудааст, ки ташкилоти мазкур ба Ҳизби халқии демократӣ ҳизби ҳокимро ишора намоянд.
Ин иштибоҳ хонандаро машкук гардонда, эҳтимоли таъсис ёфтани боз як хизби дигар бо номи “Оила”-ро дар зеҳнҳо халқ мекунад.
Кумита иттилоъ медиҳад, ки «Ташкилоти ибтидоии ҳизбии «Оила» дар Кумитаи кор бо занон ва оилаи назди Ҳукумати Ҷумҳурии Тоҷикистон барои таблиғу ташвиқи ғояҳои созандаи ҳизб, ҳадафҳои барномавӣ, иштироки фаъолона дар корҳои ҷамъиятиву сиёсӣ саъю талош намуда, аъзони он дар ҳамаи чорабиниҳои сиёсӣ, фарҳангӣ иштироки фаъолона доранд ва сафи аъзоёни он рӯз аз рӯз зиёд шуда истодааст.
Дар ҷаласаи назоратии назди Раиси Кумита Қосимзода Идигул Тағо боз як нафар корманд Абдуллоева Матлюба Шукруллоевна ба аъзогии ташкилоти ибтидоӣ қабул гардида, билети ҳизбӣ дар фазои тантана тақдим карда шуд. Аъзоёни ташкилоти ибтидоии ҳизбӣ сиёсати хирадмандонаи Асосгузори сулҳу Ваҳдати миллӣ-Пешвои миллат, муҳтарам Эмомалӣ Раҳмон сармашқи фаъолияти корӣ намуда, ҷашни 25- солагии Истиқлолияти давлатии Ҷумҳурии Тоҷикистонро бо дастовезҳои арзанда истиқбол менамоянд».
Қобили зикр аст, ки вақтҳои охир аксарият сайтҳо ва рӯзномаҳои давлатӣ бо иштибоҳ ва хатоҳои зиёд матлаб нашр мекунанд, ки боиси нанг аст. Дар худи ҷумлаҳои дар боло иқтибоси овардашуда ба ҷуз номафҳум будани ин ки ташкилоти ибтидоии “оила” ин ҳизб аст ё ташкилоти зертобеи ҲХДТ, калимаи “аъзоён” ба тамом нодуруст ва дар забони тоҷикӣ ингуна калима вуҷуд надорад. Худи калимаи аъзо ин шакли ҷамъи узв аст, ва пасванди “ён” зиёдатӣ мебошад.
ҲХДТ яке аз ҳизбҳои яккатозест, ки соли гузашта рақиби асосии худ ҲНИТ-ро бо гуноҳҳои бофтаву сохта аз саҳна ронду роҳбарони онро ба солҳои тулонӣ ва ҳукми абад зиндонӣ кард. Ҳоло ин ҳизб 480 ҳазор аъзо дошта, дар вазорату идораҳои давлатӣ зиёда аз 200 ташкилоти ибтидоии ҳизбӣ дорад.
