Қурбон Маннонови 75 сола, раиси бахши ҲНИТ дар шаҳраки Норак, дар зиндони рақами 1-и “Советский” имшаб ба шаҳодат расид
Гуфта мешавад тӯли чанд рӯзи охир вазъияти саломатиаш ваҳим буда гоҳ гоҳ хун қайъ мекардааст. Чандин маротиба хоҳиши интиқол доданаш ба беморхонаро кардааст, вале ин хоҳиши уро масъулини зиндон ба инобат нагирифтаанд.
Қурбон Маннонов рӯзи 19 августи соли 2015 аз ҷониби мақомоти интизомии шаҳри Норак боздошт шуда буд. То рӯзи 28 август на вакили дифоъ ва на хешону наздиконаш огаҳӣ надоштанд, ки ӯ чӣ гуноҳ дорад. Дар суханрониҳояш аз минбари ҲНИТ ӯ чандин маротиба изҳор дошта буд, ки ӯро ба КДАМ даъват кардаву талаб кардаанд, ки аз сафҳои ҲНИТ хориҷ шавад. КДАМ чандин бор таҳдид карда буд, ки дар сурати аз ҲНИТ хориҷ нашуданаш, метавонанд бо ҷурмҳои сохта ҳабсаш мекунанд. Аммо Қурбон Маннонов, дар як изҳороташ гуфта буд, ки
то ҷон дар тан дорам узви ҳамин ҳизб ва хидматгори Ислом мемонам!
Додгоҳи вилояти Хатлон рӯзи 17-уми феврали соли 2016 ҳукми худ нисбати 13 тан аз сокинони шаҳри Норакро, ки барои барафроштани парчами гурӯҳи “Давлати исломӣ” муттаҳам мешуданд, эълон кард, ки аз 10 то 25 сол ҳукми зиндон гирифтанд. Дар байни ин 13 нафар яке аз онҳо пирамарди 75 сола Қурбон Маннонов буд. Қурбон Маннонов ин иттиҳомро рад карда гуфта буд,
ман ба ҳеҷ ваҷҳ аз ин кор огоҳ ҳам набудам ва ширкат ҳам накардаам. Ин як мазҳакаи сохтаи мақомоти амниятист!!!
Яке аз сабабҳои боздошт ва ҳукми сангини Қурбон Манноновро дар он медонанд, ки ӯ ҳозир нашуд раисҷумҳури Тоҷикистонро “Ҷаноби олӣ” номад ва дар баромадҳояш ҳам зикр мекард, ки ҳаргиз ин корро нахоҳад кард.
Қобили зикр аст, ки тибқи маълумотҳои ба мо расида, вазъи саломатии Ҳикматуллоҳ Сайфуллоҳзода рӯзноманигори машҳур, собиқ сардабири ҳафтаномаи “Наҷот” дар беморхонаи боздоштгоҳи КДАМ низ ниҳоят нигаронкунанда будааст. Духтури боздоштгоҳ ба масъулин гуфтааст, ки ҳолати Сайфуллоҳзода ниҳоят ваҳим аст, бояд ба беморхона интиқол дода шавад, вале то ба ҳол Ҳикматуллоҳ Сайфуллоҳзода дар ҳолати вазнин дар беморхонаи боздоштгоҳ қарор дорад.
