Мақомоти милитсия дар шаҳри Душанбе як ҷавони 29-соларо бо гумони куштори холааш, зане 42-сола, боздошт карданд. Ба иттилои расмӣ, ин ҳодисаи фоҷеабор дар ҳолати сархушӣ сурат гирифта, сабаби он баҳсу муноқиша миёни ҷонибҳо будааст.
Вазорати корҳои дохилӣ (ВКД) номҳои гумонбар ва ҷабрдидаро ошкор накардааст, вале таъкид мекунад, ки онҳо хешони наздик – ҷиян ва хола – буда, сокинони пойтахт мебошанд.
Тибқи маълумоти тафтишотӣ, марги зан бар асари “3–4 зарби пой ба сару рӯй” ва хунравии шадид ба амал омадааст. Пас аз ҳодиса, гумонбар ҷасади холаашро ба ҳаммом бурда, сару рӯяшро шуста, либосашро иваз намуда, сипас дар айвони хунуки хона гузоштааст. Ҷабрдида аз сабаби хунравии зиёд ва сардӣ ба ҳалокат расидааст.
Нисбати гумонбаршаванда бар асоси моддаи 104 Кодекси ҷиноятии Тоҷикистон (одамкушӣ) парвандаи ҷиноятӣ боз шудааст. Ба ин ҷавон 8 то 15 соли маҳрумият аз озодӣ таҳдид мекунад.
Ин фоҷиа бори аввал нест, ки чунин навъи ҷиноят миёни хешовандон рух медиҳад. Масалан, моҳи августи соли 2024 Ҳукмиддин Салоҳиддинов бо гумони куштори хоҳарбузургаш Шодиой Салоҳиддинова боздошт шуда буд. Ҳамчунин, 31-уми августи соли гузашта Илҳом Раззоқови 26-сола бо гумони куштори ҳамсараш Баҳринисо Боқиева ба воситаи буғӣ кардан дастгир гардид.
Мақомоти тафтишотӣ ҳамоно идомаи корро барои ошкор кардани ҷузъиёти бештар дар ин парванда пеш мебаранд.
