Самандар Қӯқанов, яке аз нахустин мухолифони ҳукумати Узбакистон, ки зиндонӣ шуда буд, 24 ноябр баромадааст. Тавре пайвандони Қӯқанови 72-сола мегӯянд, парвандаи охири вай бекор шудааст.
Самандар Қӯқанов, рӯзи озодӣ аз маҳбас
Ин мухолифи узбак 2 июли соли 1993 бо айби исрофкорӣ дар моли давлат зиндонӣ шуда буд.
Дар асл муҳлати зиндони вакили собиқи порлумон ва раиси корхонаи коркарди нафти Чинози Узбакистон Самандар Қӯқанов, ки 23 солу 4 моҳ дар зиндон нишаст, 6 октябр ба охир расида буд.
Аммо бар ивази раҳоӣ аз зиндон, додгоҳи вилояти Навоии Узбакистон тибқи ду моддаи кодекси ҷиноӣ ба ҳукми Қӯқанов 5 солу 3 рӯзи дигар зам кард.
Қӯқанов соли 1989 ҳамроҳ бо Шавкат Мирзиёев, иҷрокунандаи феълии вазифаи президенти Узбакистон вакили порлумон интихоб шуда буд. Пайвандон ва ҳамсафони Қӯқанов мегӯянд, вай бо фармони бевоситаи Ислом Каримов зиндонӣ шудааст. Ин мухолифи узбак дар таърихи муосири узбакистон тӯлонитарин муҳлати зиндонро пушти сар кардааст.
