Ҳизби наҳзати исломии Тоҷикистон (ҲНИТ), ки фаъолияти он дар Тоҷикистон мамнуъ эълон шудааст, аз тағйири шакли фаъолияти худ хабар дода, эълон кард, ки минбаъд таҳти унвони «Наҳзати исломии Тоҷикистон» фаъолият хоҳад кард.
Дар изҳороти расмии созмон, ки рӯзи 2 июн нашр гардид, гуфта мешавад, ки ин тасмим бо сабаби набудани шароити муносиб барои фаъолияти ҳизбии сиёсӣ дар Тоҷикистон гирифта шудааст.
Раиси ҲНИТ Муҳиддин Кабирӣ изҳор доштааст, ки ҳадафи асосии ҳар ҳизби сиёсӣ иштирок дар рақобати сиёсӣ ва мубориза барои ба даст овардани ҳокимият тавассути роҳҳои қонунӣ мебошад. Ба гуфтаи ӯ, дар шароити кунунӣ ҲНИТ чунин имкониятро надорад ва амалан наметавонад вазифаҳои як ҳизби сиёсиро иҷро намояд.
Ба ҳамин хотир, роҳбарияти созмон қарор кардааст, ки дар шароити муҳоҷират ва фаъолият дар хориҷ аз кишвар, шакли ҳаракати ҷамъиятӣ ва сиёсӣ мувофиқтар мебошад. Аз ин рӯ, калимаи «ҳизб» аз номи созмон хориҷ карда шудааст.
Муҳиддин Кабирӣ ҳамзамон таъкид намудааст, ки ин тағйирот ба маънои даст кашидан аз фаъолият нест. Ба гуфтаи ӯ, агар дар оянда имкони фаъолияти озоди сиёсӣ дар Тоҷикистон фароҳам гардад ва шароити пешина барқарор шавад, созмон метавонад дубора номи ҳизбиро барқарор кунад.
Вай инчунин ёдовар шудааст, ки дар давраи ҷанги шаҳрвандӣ низ ҲНИТ маҷбур шуда буд берун аз кишвар фаъолият барад ва шакли кори худро мутобиқ ба шароити он замон тағйир диҳад.
Дар посух ба суол дар бораи он ки чаро чунин қарор пештар қабул нашуд, Кабирӣ гуфтааст, ки дар солҳои охир шумораи зиёди аъзои ҳизб барои гирифтани паноҳандагии сиёсӣ дар кишварҳои Аврупо муроҷиат мекарданд. Ба гуфтаи ӯ, тағйири ном дар он марҳила метавонист барои онҳо мушкилоти ҳуқуқӣ ба вуҷуд оварад.
Ба гуфтаи роҳбари созмон, ҳоло аксари ин равандҳо ба анҷом расидаанд ва барои тағйири шакли фаъолияти ташкилот монеаи ҷиддӣ вуҷуд надорад.
Кабирӣ ҳамчунин изҳор доштааст, ки ҲНИТ барои ирсоли шикоят ба Суди байналмилалии ҷиноятӣ алайҳи президенти Тоҷикистон Эмомалӣ Раҳмон омодагӣ дида буд. Ба гуфтаи ӯ, ин муроҷиат бояд маҳз аз номи ҳизб пешниҳод мешуд. Ҳоло, пас аз пешниҳоди ҳуҷҷатҳои зарурӣ, тағйири ном ва шакли фаъолияти созмон ба ин раванд таъсир намерасонад.
Ёдовар мешавем, ки соли 2015 Додгоҳи Олии Тоҷикистон Ҳизби наҳзати исломии Тоҷикистонро созмони экстремистӣ ва террористӣ эълон намуда, фаъолияти онро дар қаламрави кишвар манъ кард. Пас аз ин қарор даҳҳо узв ва ҷонибдорони ҳизб боздошт шуданд ва қисми зиёди фаъолони он кишварро тарк карданд.
То замони нашри ин хабар, мақомоти Тоҷикистон дар бораи эълони табдили ҲНИТ ба ҳаракати «Наҳзати исломии Тоҷикистон» изҳори назар накардаанд.
TajNews рушди минбаъдаи ин мавзӯъро пайгирӣ намуда, дар сурати нашри вокуниши расмии мақомоти кишвар онро ба хонандагон пешниҳод хоҳад кард.
Шоҳиди ҳодисаи муҳим шудед?
Иттилоъ, акс ё видео фиристед — маводҳо махфона баррасӣ мешаванд.
