Бонки аврупоии бозсозӣ ва рушд барои таҷдиди роҳи Балҷувон–Сари Хосор ва беҳсозии обрасонии Кӯлоб то 55,4 миллион евро қарзи давлатӣ ҷудо мекунад.
Тибқи хабари бонк, то 49,2 миллион евро барои таҷдиди 56 километр роҳи Балҷувон–Сари Хосор пешбинӣ шудааст. Ин роҳ бояд рафтуомади тамоми солро барои 19 маҳалли аҳолинишин бо наздик ба шаш ҳазор сокин таъмин кунад. Ҳоло обхезиҳои мавсимӣ ҳаракатро дар зимистону баҳор мушкил месозанд.
Барои иҷрои тарҳи роҳ ва чораҳои бехатарӣ то 4,2 миллион евро грант низ пешбинӣ мешавад.
Қарзи дигари бонк — то 6,2 миллион евро — барои анҷоми тарҳи обу корези Кӯлоб равона хоҳад шуд. Таҷдиди шабакаҳо, пойгоҳҳои обкашӣ, иншооти поксозии обҳои партов ва насби ҳисобкунакҳо дар назар аст. Ба гуфтаи бонк, тарҳ бояд беш аз 100 ҳазор нафарро бо оби тозаи доимӣ таъмин кунад.
Ин тарҳ то 3,4 миллион евро гранти иловагӣ мегирад. Қаблан бонк ва Иттиҳоди Аврупо барои он 16,5 миллион евро қарзу грант ҷудо карда буданд.
Ҳамин тавр, 55,4 миллион евро уҳдадории қарзии давлат хоҳад буд; грантҳои иловагӣ дар маҷмуъ то 7,6 миллион евроро ташкил медиҳанд. Дар иттилоияи бонк меъёри дарсадӣ ва муҳлати бозпардохти қарзҳо зикр нашудааст.
Шоҳиди ҳодисаи муҳим шудед?
Иттилоъ, акс ё видео фиристед — маводҳо махфона баррасӣ мешаванд.
