Шукурҷон Зуҳуров, раиси Маҷлиси намояндагони Тоҷикистон аз раиси Бонки миллии кишвар Ҷамшед Нурмуҳаммадзода дархост намуд, ки мушкили пардохти пули шаҳрвандонро то охири соли равон ба таври мусбат ҳал намояд.
Гуфта мешавад, ки ин дар ҳоле садо додааст, ки Ҷамшед Нурмуҳаммадзода дар Маҷлиси намояндагон аз рӯи тарҳи қонун “Дар бораи хидматрасониҳои пардохтӣ ва низоми пардохт” суханронӣ мекард. Ҳини суханронии ӯ дар атрофи ин қазия баҳси гарме хестааст ва Зуҳуров бо нигарониҳо гуфтааст, ки ба унвони парлумони кишвар садҳо аризаҳои шикоятӣ аз болои фаъолияти бади бонкҳо дар қаламрав омадааст ва ҳама аз он ба шиква кардаанд, ки амонатҳои худро аз бонкҳо гирифта наметавонанд.
Шукурҷон Зуҳуров ба раиси Бонки миллӣ рӯ оварда гуфтааст: “Одамҳо солҳо пул ҷамъ карда, дар бонк амонат гузоштанд, ки барои фарзандашон, масалан, хона харанд. Вале имрӯз бонк мераванд, то пулашонро бигиранд, бонк мегӯяд,“баъди як ҳафта биё, 500 сомонӣ бигир”. Ҳамон ду бонке, ки медонед (манзур “Тоҷиксодиротбонк” ва “Агроинвестбонк”, ки пули муштариёнашонро пардохт карда наметавонанд), ҳоло дар ҳамин вазъият ҳастанд”.
Ҷамшед Нурмуҳаммадзода дар шарҳи ваъияти ба амаломада гуфтааст, ки Бонки миллӣ ба аҳоли қарзи фаровоне дода ва 57 дарсади ин қарзҳо проблемавӣ ҳастанд, яъне аҳолӣ бинобар бӯҳрон имкони пардохти дубораи онро аз даст додаааст. Аммо ба гуфтаи раиси Бонки миллии Тоҷикистон, комиссияи махсусе дар робита ба ин қазия кор мебарад ва роҳи ҳалли ин мушкилро се моҳ ин ҷониб меҷӯянд.
Шукурҷон Зуҳуров, раиси Маҷлиси намояндагон ба Нурмуҳаммадзода ҳушдор додааст, ки “то охири ҳамин сол мушкилро ҳал кунанд, бонкҳои дигар низ ба ҳамин ҳол гирифтор мешаванд.” Раиси Бонки миллӣ ваъда додааст, ки ин мушкилро албатта ҳал менамояд ва механизми берун омадан аз ин бӯҳронро аллакай рӯи даст дорад.
Дар ҳамин ҳол, тарҳи қонун “Дар бораи хидматрасониҳои пардохтӣ ва низоми пардохт” пас аз баррасиҳо пазируфта шуд ва гуфта мешавад, ки ин қонун ба ҳуқуқҳои Бонки миллӣ афзудааст. Аз ҷумла, бештар аз 2000 сомонӣ пули аз хориҷ интиқолёбандаро месанҷад ва пас аз он ба мизоҷ пардохт менамояд. Инчунин қонуни мазкур пешбинӣ кардааст, ки тамоми сохторҳои интиқоли пул, ба монанди «Вестерн Юнион», «Анелик», «Мани Грам» аз ин баъд бояд барои фаъолият дар Тоҷикистон аз Бонки миллӣ иҷозатнома гиранд.
