Ба идораи мо муроҷиате расид, ки дар он хонанда аз вазъи нохуби кори таксиҳои фурудгоҳи Душанбе шикоят кардааст. Бо хоҳиши ӯ, мо матни муроҷиати ӯро ба таври пурра нашр мекунем:

Ба сардори Раёсати Вазорати корҳои дохилӣ дар шаҳри Душанбе

Генерал-майор Шарифзода Шоҳрух Саид

Муҳтарам Шарифзода Шоҳрух Саид!

Иҷозат диҳед, ки барои фаъолияти масъулона ва касбии Шумо, ки ба нафъи ҷомеа ва шаҳри мо равона шудааст, изҳори сипос намоям. Роҳбарии боадолат ва босалоҳияти Шумо ҳамеша намунаи ибрат барои дигарон мебошад.

Сабаби муроҷиати ман ҳодисаи нохуше мебошад, ки 2 январи соли 2025, тахминан соати 3-и субҳ, дар фурудгоҳи шаҳри Душанбе рух дод. Пас аз бозгашт аз хориҷи кишвар, ман бо дӯстам ба ҳолати ногуворе дучор шудем, ки бо фаъолияти баъзе таксиҳо алоқаманд буд.

Мо кӯшиш кардем, ки таксие пайдо кунем, ки бо ҳисоби ченак (счётчик) кор кунад, аммо аксарияти ронандагон ё аз мо масири сафарро пурсон мешуданд, ё аз истифодаи ченак саркашӣ мекарданд. Дар натиҷа, мо ба таксие аз ширкати «4444» (Сабоҳ Таксӣ) нишастем, ки ронандааш бо истифодаи ченак розӣ шуд.

Бо вуҷуди ин, ҳангоми сафар ман пай бурдам, ки дар телефони ронанда барномае насб шудааст, ки монанди барномаи расмии ширкат набуд. Ба саволи ман дар бораи барнома, ронанда ҷавоб дод, ки аз нусхаи ғайрирасмии он истифода мебарад. Ин боиси шубҳа шуд, чун ман медонистам, ки чунин барномаҳои қалбакӣ аксар вақт боиси боло бурдани арзиши сафар мешаванд.

Пас аз он ки ҳамагӣ 2 километрро тай кардем, ченаки ронанда 14,5 сомонӣ нишон дод, ки 4,5 сомонӣ аз он ҳамчун маблағи интизорӣ ҳисоб шудааст. Ин ҳолатро нодуруст ҳисобида, ман ба ронанда муроҷиат кардам. Вале ӯ ба ҷойи шарҳи мушкил, бо лаҳни дағал аз ман талаб кард, ки мошинро тарк кунам.

Чунин муносибати бад бо мусофир бо ин анҷом наёфт. Ҳангоми наворгирии ҳодиса, ронанда иддао кард, ки корманди мақомоти ҳифзи ҳуқуқ аст, вале ҳуҷҷати тасдиқкунандаи шахсияташро нишон надод. Ӯ ҳатто аз ман талаб кард, ки наворро пок кунам, ва бо таҳдид маро аз ҳаракат дар дигар таксӣ боздоштанӣ шуд.

Аз рӯи ин ҳодиса ман хоҳишмандам:

1. Санҷиши истифодаи барномаҳои ғайриқонунӣ аз ҷониби ронандагон;
2. Пешгирии ҳисобҳои нодурусти сафар ва фиреби мусофирон;
3. Назорати фаъолияти таксиҳо дар фурудгоҳ ва муайян кардани ҳолатҳои монанд;
4. Таҳқиқи иддао дар бораи он, ки ронанда корманди мақомоти ҳифзи ҳуқуқ аст, ва тафтиши сӯистифода аз ваколатҳо.

Бовар дорам, ки кӯшишҳои Шумо ба бартарафсозии ин мушкилот кӯмак мекунанд ва дар такмили обрӯи шаҳри Душанбе ҳамчун макони меҳмоннавоз саҳм мегузоранд.

P.S. Ман сабти видеоии ҳодисаро пешниҳод карда метавонам.

Мо умедворем, ки мақомот ба ин масъала таваҷҷуҳ зоҳир намуда, ба ҳалли мушкилот чораҳои зарурӣ меандешанд. Ҳар як хонанда низ метавонад бо пешниҳоди дархостҳо ва мушкилоти худ ба идораи мо муроҷиат намояд. Мо омодаем, ки овози Шуморо расонаӣ кунем!