Кормандони милитсияи Тоҷикистон марди 63-сола, сокини шаҳри Ваҳдатро бо гумони савдои одамон дастгир карданд. Мақомот мегӯянд, ки ӯ дар ҳамкорӣ бо як шаҳрванди Арманистон ва як сокини ноҳияи Қубодиён, даҳҳо нафарро ба асорати меҳнатӣ дар хориҷа фиристодааст.

Мухтасари ҳодиса

Ба иттилои ВКД, боздоштшуда аз моҳи декабри соли 2024 бо маслиҳати пешакӣ бо марди 38-сола аз ноҳияи Қубодиён ва шаҳрванди Арманистон Бабаян Колия нақшаи фиреб ва истисмори шаҳрвандони Тоҷикистонро тарҳрезӣ кардааст.

Онҳо ба боварии шаҳрвандони Тоҷикистон, аз ҷумла мардони 40, 38, 34 ва 54-сола аз шаҳри Ваҳдат ва ноҳияи Данғара даромада, онҳоро бо ваъдаи корандозӣ дар Арманистон фиреб дода, ба ин кишвар интиқол додаанд. Аммо пас аз расидан ба Арманистон, шаҳрвандони тоҷик ба асорати меҳнатӣ гирифтор шуда, шиноснома ва ҳуҷҷатҳои онҳо мусодира гардидааст.

Милитсия мегӯяд, ки гаштугузори қурбониён маҳдуд шуда, онҳо маҷбур буданд дар шароити бесифат ва ғайриинсонӣ кор кунанд.

Давомнокии ҷиноят ва қурбониёни бештар

Ба ҳамин тарз, гурӯҳи мазкур аз моҳи ноябри соли 2024 низ бо истифода аз шеваи ҳамсон шахсони 32, 31, 38, 35 ва 22-солаи сокинони ноҳияҳои Данғара, Шаҳритус ва шаҳри Ваҳдат-ро низ ба асорати меҳнатӣ дар Арманистон кашидаанд.

Қурбониён, ки ҳама мардон буданд, гумон намекарданд, ки ба дом афтодаанд, то он даме ки ҳуҷҷатҳои онҳоро бо роҳи маҷбурӣ гирифта, ҳаққи раҳо шуданро аз онҳо гирифтанд.

Парвандаи ҷиноятӣ ва ҷараёни тафтишот

Нисбат ба марди 63-солаи боздоштшуда, марди 38-солаи сокини Қубодиён ва шаҳрванди Арманистон Бабаян Колия парвандаи ҷиноятӣ бо қисми 2 иловаи 1 моддаи 130 Кодекси ҷиноятии Ҷумҳурии Тоҷикистон оғоз гардидааст.

Тафтишот идома дорад ва эҳтимолан афроди бештар дар ин ҷиноят даст доранд. Мақомот аз шаҳрвандон даъват мекунанд, ки ҳангоми дарёфти пешниҳоди кор дар хориҷи кишвар эҳтиёткор бошанд ва танҳо аз роҳҳои расмӣ кор пайдо кунанд.

Савдои одамон яке аз ҷиноятҳои сангинтарин дониста мешавад, ки оқибатҳои ҷуброннопазир дорад.