Вазорати фарҳанги Ҷумҳурии Тоҷикистон нақша дорад, дар соли ҷорӣ «Дастурамали либосҳои тавсиявӣ барои духтарон ва занони Тоҷикистон»-ро бо илова ва тағйироти нав аз нав нашр намуда, ба мардум пешкаш кунад.
Ба иттилои АМИТ «Ховар», ин дастурамал аз 16 боб иборат буда, дар он тавсияҳо оид ба пӯшидани либосҳо барои наврасон, аз синни 7-сола сар карда, пешниҳод шудаанд.
Лоиҳаи мазкур бо саҳми намояндагони Кумитаи кор бо занон ва оила, инчунин Кумитаи дин, танзими анъана ва ҷашну маросими назди Ҳукумати Ҷумҳурии Тоҷикистон таҳия шудааст.
Дастурамал хусусияти тавсиявӣ дошта, дар он пӯшидани либосҳо барои истифодаи ҳаррӯза, рӯзҳои истироҳатӣ, инчунин дар чорабиниҳои расмӣ ва ҷашну маросим пешниҳод мегардад.
Ёдовар мешавем, ки нашри нахустини ин дастурамал соли 2018 сурат гирифта буд ва ҳадафи он ҳифзи арзишҳои миллӣ, тарғиби фарҳанги либоспӯшӣ ва мутобиқ сохтани намуди зоҳирии шаҳрвандон ба меъёрҳои миллӣ мебошад.
Нашри такрории дастурамал ба таҳкими ин ҳадафҳо равона гардида, интизор меравад, ки бо таваҷҷуҳи бештар аз ҷониби ҷомеа пазируфта шавад.
