Сарвари нави Сурия, Аҳмад аш-Шароо, дар ҷараёни мулоқот бо ҳайати Русия талаб кардааст, ки Башор Асад, ки пас аз сарнагунии режимаш ба Русия фирор кардааст, ба Димишқ таслим карда шавад. Дар ин бора Reuters бо истинод ба манбаъҳои худ хабар додааст.

Ба гуфтаи агентии давлатии Сирия (SANA), дар гуфтугӯҳо инчунин масъалаи пойгоҳҳои низомии Русия дар Тартус ва Ҳмеймим баррасӣ шуд. Димишқ аз Маскав ҷуброн ва эътирофи «хатогиҳои гузашта»-ро талаб кард, аммо ҷониби Русия ин талаботро рад намуд.

Ба иттилои Reuters, ягона созишномаи бадастомада байни ду тараф – идомаи музокирот мебошад. Ин ҳолат нишон медиҳад, ки равобити миёни Димишқ ва Маскав баъд аз сарнагунии Асад шиддат ёфта, ояндаи ҳузури Русия дар минтақа зери суол қарор гирифтааст.